يعنى أيه الشعر للشاعر سعد الشرقاوي

(يعنى ايه الشعر؟)
الكلام لو صدق دايما
بتلاقيه طالع مساوى
تجدل الكلمة بقصيدة
تغزل الحرف بغناوى
مش حداثة واللا موضه
واللا شاعر لسّه هاوى
المهم تكون بتكتب
حاجه قلبك ليها غاوى
,,,,,
هوّ ايه الشعر يعنى؟
غير نفس مليان مشاعر
جايّه توصف أىّ حاله
عايشه لحظه ف قلب شاعر
هات رسالتك بالبساطة
خاليه من كلّ الحواطه
جايبه حالتك ع البلاطة
مش فكاكا وشغل حاوى
,,,,,
الكلام منـّك يعانى
لمّا تلعب بالمعانى
والهدف م الفكر يهرب
والشروخ تهدم مبانى
تملى كلّ البيت عيوب
وتعالجها برص طوب
والتعب فضىّ الجيوب
والحروف تعجز تداوى
,,,,,
سيب خيالك يحكى حالك
هات لى كلّ ماجه فى بالك
احكى والاحساس فى لحظة
يحتوينى أعيش مكانك
وتلاقينى معاك ياغالى
والكلام يسكن خيالى
والحوار يشغللىّ بالى
تحيى فى قلوبنا الحكاوى
,,,,,
خلىّ شعرك يبقى طيرك
يلمح الكلمه ف ضميرك
يبقى فاهمك وانت فاهمه
مش رباية حدّ غيرك
اوعه ايدك تبنى عشـّه
وتيجى لحظة عليك تغشـّه
واللىّ شوفت النور فى وشـّه
بصّ فيه واكتب غناوى
,,,,,,
ليه يضيع المعنى وانت
كلّ همّك فى القوافى
زىّ لابس بدله كامله
والقدم من تحت حافى
دا الشياكه تبان عليك
من ملامحك من عنيك
نص واحد هايداريك
وتلاقيك أصبحت خاوى
,,,,,,
(سعدالشرقاوى)

وّ ايه الشعر يعنى؟
غير نفس مليان مشاعر
جايّه توصف أىّ حاله
عايشه لحظه ف قلب شاعر
هات رسالتك بالبساطة
خاليه من كلّ الحواطه
جايبه حالتك ع البلاطة
مش فكاكا وشغل حاوى
الله ينور يا استاذ
كل التحيه وكل التقدير