بحب عيشة الشرقية

الشاعرة الاستاذة
وفاء الامير
كلمات خصبة
بخصوبة ارض النيل
وحروف خضرة مثمرة

آه يازمانى لو امكانى
أعود من تانى لأحلى سنين
وتقدر يعنى انّ ترجّعنى
أبصّ ورايا سنة ستين
اشوف السّاقية تلفّ الطارة
وأعشق كلّ بنات الحارة
وأشبك أملى على السّنارة
وحنش الطعم ف لحف الطين
,,,,,,
عند المورده ساعة عصريّة
وأحلى صبيّه بتغسل غلـّه
واعمل حيلة وفكرة جميله
أقول عطشان تناولنى القله
واشرب وانا مكسوف ع ألآخر
والخطوات منىّ بتتـّاخر
والحب ف قلبى مالوش آخر
وف ايدى كام ورده وفلـّه
,,,,,,
لها ضحكه بتدّاره ف خوفها
لو ابوها بالصدفة يشوفها
ورسالة بالشوق توصلنى
فى حكاية بتنطق بكسوفها
تتردّد فى ودانى الحاكية
وانا باشرب من شاى الراكيه
واحايل فى انين الساقية
لو تطلع م الدار واشوفها
لكم كل تحية