حلم قلبى

حلم قلبى
*******
يا أهل الهوى ..
ياعاشقين ..
تعالوا ، قربوا ، واسمعوا ..
هحكي ليكوا حلم جميل ..
يمسح دموع الحيرانين ..
صلوا بينا على النبى الكريم ..
خير اللهم إجعله خير ..
قال ايه .. جانى من بعيد ..
على حصان ابيض كبير ..
اللى كنا بنحلم بيه واحنا صغيرين ..
طبعا كلنا فاكرين ..
لا أعرفه ولا يعرفنى ..
ولاكنت شوفته ..
ولا حتى شاف رسمى ..
بس كنت لمحته مرة ..
فى كلمة .. فى غنوة .. لعبد الحليم ..
شبك إيده فى إيدى ..
هربت .. قال لى ماتخفيش ..
وأخذنى من إيدى بحِنيّه ،
وبإصرار حكيم ..
قال لى : غمضي عنيكى يا حبيبتى ..
وحسي بيّا ..
فــ قلبك شفت أحلامى ..
حمام أبيض بيفرد في البحور قلبه ..
دانا ياحبيبتى بحتجلك ..
ولما تغيبى بشتقلك ..
بحبك ليل وصبح جميل..
تعالى نروي الشوق بكام نظرة ..
ده أنا العاشق لأحلامى وأحلامك ..
وهمس ليا : حسّانى ؟
وطار بيا
على حصانه الأبيض
هناك فى السما عالى ..
عقد لى النجوم ..
وعلى قلبى الصغير لبسهانى ..
وقال لى ياحبيبتى لاليلي لالي ..
ولما حس برعشة إديا ..
غزلى بأحلامه شال حرير ابيض ..
وبيه دفانى ..
وخدنى جنب القمر ..
همسنا وغنينا ورقصنا ..
لكل قلب عاشق ..
رقصنا للقمر ..
إحساس رقيق حسيته فيه ..
جت معاه نسمة ربيع مشتاقة ..
حلفت لى إنى مش نايمة ..
وباست راسى .. وراحت ماشية ..
باس كفى .. وحطه على جبينه ..
وقال لى هنا جنتك وبستانك ..
وقطف لى وردا حمرا ..
شبكها على فستانى ..
ومد كفه على جبينى ..
وقال لى هنا وطنى ..
وكتب " أمل " برمشه ..
ورفع علمى ..
وطبطب على قلبى الصغير ..
دمعه فرت من عنيا ..
غصب عنى .. آه من الحنين ..
أخدنى فى حضنه وضمنى ..
حضن أم مشتاقة لوليد ..
قال لى نامى يا حبيبتى ..
وحصّنى بذكر الرحمن ويس ..
ولما صحيت .. حكيت حلمى ..
لناس زيكم .. عاشقين ..
قالوا لى : دى رؤية من رب العالمين ..
يعنى ممكن
يبقى فى الغيب حقيقة ..
أكيد .. أكيد ..
قولوا معايا .. آمين ..

الاستاذه امل الشريف

دعينى اولاّ ارحب بك . واقول أهلاّ وسهلاّ

شرفنا بإنضمامك لاسرتنا الادبيه فى بيتك ومنتداكِ .

حلم جميل . وكلمات نثريه نتمنى ان نشرف بقراءة المزيد منها .

نورتِ المنتدى ومرحباّ بك .

تحيتى وتقديرى ..