فرعون قبل التنحى

يابلدى ياللى الحلم فيكى دروبه بعيده



والظلم اصبح فاشى ..والصبر اصبح فريضه



شربت م البحر ياما.. ونيلك داقق ببانك



زرعت ارضك بيدى ..وخيرها كان للى خانك



وقوليلى غلطه مين ..لو باعك ابنك وهانك











من ييجى تلاتين سنه ..جيبتلنا فرعون جديد



قالولنا قائد وبطل ..طلع غبى وعنيد











امبارح طلع وقال "قله ومندسه"



شكل البعيد ده غبى ..وضرس العقل هعنده .



ما طلعش فاللثه











قال ايه وقالك كمان "ايه يعنى كام مليون"



والشهدا ميه ومتين والدم بقى للعوم



وانا ذنبى ايه يعنى ..ما تشهدونا ياقوم



شوفوا انجازات عصرى ..وقولولى ايه رايكم



سبتونى تلاتين سنه ..بمصمص دمكم



ولا اشتكيتم فيوم .. بالذمه في زيكم











على العموم هانت .. تسع شهور وامشى



عارف راح اوحشكم ..م العشره ماتهونشى



وعشان خاطركم بس ..قلت لجمال يابنى



اقعد وماتقومشى







وضحكت بس بادب ..ضحكه وليها العجب



باعوا الحديد والخشب ..حتى اللى باقى منك



خلاص يابلدى اتنهب







هو انتى موجوده ..ولا فى خيالى بس



جمله ومعهوده .."مش عايز اسمع حس "



قلت له اسف ياريس "بس على الله تحس"















قصيده (( فرعون)) ل عمرو فرحات

الشاعر الجميل عمرو
قصيدتك الجميلة تعبر عن مرحلة
لا أعادنا الله لمثلها
وربنا يعوض علينا
وحسبنا الله ونعم الوكيل في من ظلم 80 مليون مصري
تحياتي ومودتي

اشكركم على المتابعه وارجو النقد للاستفاده قدر الامكان