خيبة أمل

(خيـبة أمل)
حاخـْبَطْ دماغى فى حيط المحكمه بالليل
وارفع بايدى القرار مكتوب على منديل
وأغنىّ ع اللىّ هرب لو كان واخد اعدام
ازّاى هايرحل نظام سايب وراه كام ديل
,,,,
دعْوة لصنف النسا بدل الحَبـَل هانبـيضْ
علشان نظام البلد فيه الرجال بتحيض
اصل القانون عندنا راح يعدم الهَرْبان
وياخد براءة اللىّ كان ع الامر والتحريض
,,,,,
يا ام الشهيد افرحى ابنك طلع غلطان
من يوم مادفع التمن بشهادة الميدان
كان فاكر ان البلد حاتعود لأولادها
لقى اللىّ خدْها شبح بيحطم الانسان
,,,,,
والجدْر ماددْ وفارد فى البلاد سمّه
داير يـبَحْـتر فساد ولا حَدْ هايلمّه
يلخمنا فى الاستاد ونتوه مع الاعلام
وان كان على الاعدام ولا حدْ هايشمّه
,,,,,
خيـبة أمل يابلد بتلفىّ ع الفاضى
الجانى فيكى هربْ والمتهم قاضى
سيف العداله أمل عايشين على نوره
لو غاب ضميره يموت الطفل مش راضى
,,,,,
حوار ياوطنى ياشامل م الديول شلـّه
حتى ف مصير الاممْ نقعد ونـتسلــّه
هدّيتوا ليه عزمنا بوّظتوا أعصابنا
واليأس صابنا وأصحاب الشرف قٍلــّه
,,,,,
لو فاض عليّه الغاز هاعمللىّ شوّايه
واصنع طابور الجاز للخلق سهّايه
والجانى لو فى القفص هايبان بشكل جديد
كومبارس داخل حديد متغطىّ بملايه
,,,,,
يوم المحاكمه خراب فى كنيسه أو جامع
ويروح نظرنا لضباب مع كام واحد لامع
والجوْ يومها تلاقيه ع الحق غمىّ عنيه
والامن انده عليه يعمللىّ مشْ سامع
,,,,,
ماهى كات ماسورة فساد ومْتـَرْشقه فى الارض
لوّث خرابها العباد والفقر جه بالعرض
والحزب منها انـتشر وأخدله كام سكــّه
وفاضلْ لـُه تكــّه وهايـبـيعها عشان القرض
,,,,,
يامقسّمين البلد كوم الغلابه فين؟
ماتفكــّروش انهم ماتوا عشان ساكتين
دا الشرع حدّدْ نصيب للىّ حضر مقسوم
وهمّا كومهم هموم لازم يسدّوا الدّين
,,,,,,,