دومَنا

انا البَفَّه الي بتجيلي في اخر الدور
وانا الطابق مبعترني الورق دومَنا
سبع ورقات بتتعازم علي خسارتي
واضَمِّن؟..
لا دا اوراقي مهيش ضامنه
وشيش الحلم متأفل اصاد وشي
ويك الدو متنفعشي اصاد الدش
وانا ورقي مأسفعنيش بشيش ولا بيش
ومحروق البلاط في الدور مهوش بيخش
زهقت الاعده ع القهوه
لعبت زياده عن عشرين هباب طابق
ولا اكسبشي
وانا طابق علي شعري السكوت اوراق
وورق الدمنه مرحمشي
زهقت الدور
ويخربيتها دي العَشَرَه
وكاتب اسمي طباشيره
وتحت الاسم صفر كبير
وشكلي هخادها انا صايمه
مفيش ولا بنط للتغيير
انا مكشوفه اوراقي ومش عارف بلاعب مين
انا مرمي في قلب البير
وما كنتش انا يوسف
ومطلعتش
ومزهقتش ..دنا مقتول
دوام الحال علي حاله مزِِهقِتنِيش
مش اسهل من ضلام البير
ولا اصعب من شعاع النور
وانا لسا في ام الدور
بلاعب نفسي ع القهوه
وفاضل بنط واحاسب على المشاريب
ومين لاعيب؟
يشفلي ازاي يكسبني
يوعيني يفهمني
اصول اللعب والمكسب
دنا نفسي إن انا احسب
واعد في مره انا كام بونط
ودوري احط في اللعبه وانا مجَلِّي
فقمت سحبت طلعتلي كمان بفه
واجر كمان ويطلعلي جوهار اليأس
ويك البيش
ولسا بعيش وانا خسران
لا بتشطر انا واكسب .. ولا ليا الزمان فوت
منيش لاعب ولا محاسب
وهتخانق مع الاعدين
واشوف اخر عزوف حالي
موديني لحد لفين
انا زهقان من الاعده
كفايه زياده عن عشرين سنين طابقه..
علي صدري
وطابق ييجي ورا طابق وبيعدي
وانا اعد مباعديش
وتِنزَل الحياه للشيش
لهو بيفتح ولا يوارب
ولا بيطلعلي في الدومنا
خسرت البنط واللعبه مخلصتشي
ولا عرفتش بلاعب مين
ولا الفوره عارفها بكام

أحمد عبد الرازق