بسمه مش بتغرق

أنا طوبه في ايد الحلم مرميه


علي بكره عشان يديني تغريده


أرددها فتصبح غنوة البسمه


علي شفة منديها دموع قلبي


أنا رسمه في ورقة بفره محشيه


أسي وضلمه تعادي ضي حاميها


ساعات ببقي ضريح بيزوره سجاني


يطلع ليا ف لسانه بسخريه


يقول لساك مبتبطلش أحلامك


فأخاف يسجن حكاية عِند وقتيه


مع الايام


رضيت اني اكون صخره في ضل الموج


علي يمينه يهدد بيا أحلامي اللي فوق الشط


علي شماله يكفر ذنب اني حلمت


فيتكرم ويرميني ف حزن الشط


ف من حظي يلاقيني حبيب فرحان


يحس بان معشوقته سابت ذكري علي الموجه


بتندهله عشان ينجدها م القشه


اللي كانت وهم تنقذها


فيرميني ويطبع فيا بشفايفه


دموع فرقتها وبعادها في موت منه


اكون طاير فأطل بقلبي ع البسمه


او الذكري


ومين عارف


انا ممكن الاقي حبيبته ترسملي


علي جبيني


شجر فرحه وزَهرِيّه


ماليها الضحك وبيبانها




تسكّ الجرح لا يدخل


الاقي نفسي فوق مركب


يطوّحها


أنين البحر والغربه


ويلقفني


أمل بيصارع الضلمه


ف يحسم بيها معركته


أكيد الضلمه تكسبها


لأن الشمس بدايتها من الضلمه


وبرضه الشمس نهايتها علي الضلمه


أفوق م الحلم ألاقيني


جدار عازل علي الضحكه


وبيحاولوا


يِهِدُّوني وأنا منهم


وبيحاولوا يشدوني بعيد عنهم


وانا منهم


ف يلمح دمعتي بنيه


يادوب داخله بفستانها


غابات الشوق


فتتعرّي


فبتحاول تفصّل مني ملابسها


فـ بتْكسّر


ويبقي أولي ضايع


واضيع من اخري بالمره


فأحس الفرحه بتنور وتغمزلي


تقولي الصبر بيفَوَّر


قلوب بالخوف مِصَدّيه


ومهما غرقت بالبسمه فـ بِحار الأنّ


أكيد أَمَلك هيبني فوق معديّه




[/size][/size]