مبنى جميل

بسم الله الرحمن الرحيم



مبنى جميل ؟؟



قالك ان فى مبنى جميل
وصفه يفوق كل المسموح
تحفة وروعة ملهوش مثيل
مبنى بجد يرد الروح !!!
**
الارضية ماليهـا رخام
من نوع نادر مش موجود
حاجه يا ناس ولا فى الاحلام
ويا بخت النعل الموعود
**
فوقها تلاقو يا خلق كمان
سجاد احمر شغل ايران
لما تشوفو تحس ببهجة
وينسيك كل الاحزان
**
ثم جدار المبنى يا سادة
من نوع طارد للحشـرات
اصل سيادته نزيه وبيصرف
ومكلفه شىء وشويات
**
واكمن الاجواء فى بلادنا
فيها رطوبة وحر سخيف
يبقى لازم وضرورى ياسادة
يركب عنده كمان تكييف
**
وان جاع مره وحب دليفرى
من { بينو } فى الشانزلزيه
يبقى لازم له ضرورى ياسادة
تليفون دولى اسم الله عليه
**
واهو بالمرة يضيع وقته
زى ما ضيع مالنا سنين
ويطمن احبابه وعيلته
على احواله كل يومين
**
ود كله غير التلاجة
والحمام الفخم الشيك
ولا صالونه الاثرى المدهب
من ايام حكم المماليك
**
وحبايبه من قلب واشنطن
بعتين له تلت انتريهات
سودة ولونها يناسب قلبه
واهو كله يزود حسنات !!!!
**
وعشان يشعر كده بأمان
وف مبناه يرحرح ويبات
راقب كل حدود المبنى
ومداخله كده بالكاميرات
**
وخلاصة تكلـفـة المبنى
يا للى سامعنى فين ما تكون
بعد مجمعناه وحسبنا
تيجى 15 ملـيـــون
**
بس فى حاجة واحدة يا عالم
خلت عقلى بقى محتار
اللى بنى له المبنى د كله
ازاى ينسى يزود بار !!!
**
قصره ياعالم قبل مالغبط
واشيل ذنبه يا بنى ادمين
راح اقولكوا على سر المبنى
ر غم ان انتوا اكيد عارفين
**
اصل المبنى ما هواش فيلا
ليها جنينه وفيها ورود
ولا كان قصر يا ناس ولا حاجة
د مجرد مدفـن مـحـدود !!!
**
ايوالله ياعالم مدفن
راح يستقبل فيه الملكين
ويحاسبوه فيه على اعماله
وعلى نهيبته لبلدى سنين
**
وانا مش عارف والله اضحك
ولا ازعل من قلبى عليه
ازاى من اموال مسروقة
يبنى يا عالم مدفن ليه
**
دنا لو سارق لقمة عيش
اول مالمح طرف شاويش
يا هكلها بسرعة يا هرميها
قبل سؤالى او التفتيش
**
وهخاف انى اواجه بشرى
بسريقتى وهصبح مرجوف
وازاى هو يا ناس مش خايف
ولا من ربه كمان مكسوف
**
ايها عاقل عارف دينه
يعرف ان القبر حساب
ولاتهيئته ولا تزيينه
راح يفرقوا فى سؤال وجواب
**
وان العاصى زنوبه تشينه
وف قبره يلاقيها عذاب
وان ديدان القبر وطينه
ما تميز بيه من بواب
**
وان الدنيا مهما تطول
آخرتها هنتلف ف توب
وانها مهما هتدى هتاخد
وان كفنا م لهوش جيوب
**
قُصره يا عالم ادى حكاية
مبنى بمالنا سيادته بانيه
وانا ما دخلتش علم المولى
يرحمه ولا يولع فيه
**
انا حبيت بس اديكوا فكرة
عن اسلوبة وعن افكارة
واستعداده للحظة موته
لما المولى يشاء يختاره

تمت

محمود قطب


ربنا يسامح المسلمانى من هابوا عليم
لمدفن الرئيس لبلاوى سودة
كلها ترفع الضغط وتجيب السكر
واللى ما شفش الحلقة
يكتب فى الجوجل مدفن حسنى مبارك
وشكراااااااااا