انسي يا ماما ماعنتش بابا

كنت اتمنى تكون من قلبك
كنت اتمنى تكون لي وبس
وافرح بيها واصدق حبك
وارسم بين قلبين ف النص
سهم بيدخل قلبي وقلبك
وافضل اغني بشىء يتحس
مش بشعور بيبان فيه كدبك
أو بعيون بتحب البص
،
افتحي قلبي وشوفي مين فيه
لو صدقتك كنت هقولها
لما بعدتي ما هنشي عليه
يسكنه غيرك أو ينطقها
وانتي قدرتي بهجرك ليه
تفتحي قلبك للي بنارها
ينكوي منك ألف حبيب
أو عاشق مجروح ب ثمارها
،
انتي خلاص اتطور حبك
بس لنفسك مش للغير
مش معقول هتقولي بحبك
وانتي ف قلبك كره كبير
كل اللي يهمك حدوته
تبقي بطلها ف صورت طير
وتعيشي الأدوار مظبوطه
وتخللي اللي يعيشو كتير
،
ابقي ملاكهم وابقي الملكه
كوني برنسيسة أحلامهم
كل ده مش بيأثر فيا
اللي مأثر فيا هلاكهم
كنت هكون من ضمن العامه
وابقى رهينه ف وسط صفوفهم
بس خساره كرهت اللمه
وصحيت من وهمك على صوتهم
،
واتعلمت ماكنشي ضعيف
لما عيونك تضحك ليا
واتهديت مابقتشي خفيف
مهما جمالك شد عنيا
وبقيت حاسم زي السيف
بقطع كل عباره قويه
يعني وعودك والتسويف
مش معقول هيأثر فيا
،
بس اياكي دموعك تنزل
اوعي تقولي هموت من غيرك
وانت القلب الأبيض واعزر
وان التوبه يا بابا ف ديرك
قلبي بكل ذنوبه اتكسر
وانت أكيد هتحس بطيرك
غره جماله وحسن المنظر
واما اتشطر حب يجيلك
،
كل قصايدك لسه حافظها
من أول ما بدأتي صمودك
واول كلمه تكون هنسفها
كلمه بتحيي كتير بوجودك
واللي حصللي ف عهدك ياما
أخر بيت هطويه بطرودك
انسي يا ماما ماعنتش بابا
كل قساوتي دي فضلت خيرك

ما يقعش إلا الشاطر .. بس اتعلم بقى ..

الشاعر الجميل

رضا عثمان

دا انت معبى . الله يعينك . الموضوع كتب فيه شعراء كثير

ولكن ليس بهذا الجمال . طرحت الفكره ووظفت الكلمات بسلاسه ويسر

فخرجت تلك القصيده بهذ الإكتمال الرائع .

مودتى وتحيتى ...