يابابور الغربة

[center]يابابور الغربة ياقاسى
مشتاق والنبى مشتاق
رجعنى لأهلى وناسى
دوبنى يابوى لفراق
***
ايام الغربة ديابة
والناس كما طير مربوط
يابابور ماتهّم هبابة
دَوْدِوْ ياللا وقول طوط!!
***
حلفتك يابابور ترمح
ولا توْقف فى محطات
سكاكين جوايا بتدبح
والشوق ملهوش علاجات!!
***
مشتاق لأبـويا وأمـى
دا البعد صعيب حرَّاق
وأخويا يتّح فى كُـمّى
ويقوللى كفاية فراق !!
***
وحشتنى الدار والترعة
والدومة وسجر التوت
يابابور وصلنى بسرعة
قبل الأيام ماتفوت !!!
***
وحشتنى ليـالى القمرة
والشاى على دمس كانون
وحكاوى الناس الفقرا
وقلوب عمرها ماتخون
***
مشتاق لحمام فى الجرن
حاطط على أرض امان
والقعدة فى خشم الفرن
وحاجات نسيناها زمان
***
فاكر حكاوينا الدافية
واللمة فى صحن الدار
وقلوب صافية ومتعافية
لا تخون ولاتفضح عار
***
فاكر حِسّك ياامّايا
فى الصبح يبل الريق
دعواتك لسة معايا
تنفعنى فى وقت الضيق
***
والله مسيرنا حنتلاقى
وحشونى كتير خيَّاتى
غربة وسنين سرَّاقة
نهشت بسنانها حياتى
***
مشتاق لغيطان وسواقى
وجنينة وكرم نخيل
وبنية فى أرض شرَاقى
تزرع قمح ومواويل!!
***
وعيال فى الغيط وصبايا
بيحشّوا على الدرابيس
يتلموا فى ريح عنباية
يتغدوا بجِدْع سريس!!
***
وبيوت ع الشط قديمة
ياما غنَّى عليها حمام
موال عوَّاد وفهيمة
منقوش على حيط ليام!!
***
نبقتنا ياطارحة عوافى
جمَّعتى كتير أحباب
مشتاق لهواكى الدافى
والسِرْجة ولعب الطاب
***
يانجوم الليل ياحزانى
وصّلوا لبهية سلام
عاشق وسلامى أمانة
ومفيش فى العشق ملام!!
***
راجع من حر الغربة
ملهوف على بحر النيل
عطشان ودوايا ف شُربة
والنيل عطَّاى مابخيل
***
صوتك يابابور بكَّانى
حزنان كما ناى موجوع
يابابور البعد كـوانى
من ميتا باقول يارجوع!
***
ياقليب معجون بالحُرقة
ياغريب فى بلاد الناس
ابَّاى على ليل الفُرقة
أوعر من ضرب الفاس!
***
خايف يابابور ترمينى
فى بلاد مليانة غيلان
وتضيع فى الغربة سنينى
واتعوَّد ع الحـرمان
***
خايف ملاقيشى حبايب
من بعد ماتهت سنين
وألاقى ديارنا خرايب
وارجع للغربة حزين!!

ياصعيدى واسمك عادل
أروع من ال رحبانى
يحميك الرب العادل
قلمك شعرك رح بانى
_______________________
رائع ياأستاذ عادل
والله ولا أروع من كده
تقبل مرورى ياأستاذى
لك منى أطيب التحيات

فاكر حِسّك ياامّايا
فى الصبح يبل الريق
دعواتك لسة معايا
تنفعنى فى وقت الضيق
الله الله الله
والله عاجبنى كلامك
ومطرى يا صاحبى الروح
يمكن علشان عياخدنى
لصبا ذكراه ما تروح
عياخدنى لاهلى وناسى
وصفا جلبى واحساسى
وعيون تضحك وتواسى
ما تسيبش فؤاد مجروح

الف الف تحيه ابها الصوت القادم من اعماق فطرتنا بصفااه وعذوبتها ورقتها اللى زى واحه بنلاقى فيها الهدوء و السكينه

الشاعر القدير والقطب الكبير/محمود قطب
عارف اول مااكتب القصيدة يلحقنى واد عمى....برضه اللى ليك ليك..واهلك لاتهلك
...وتانى حاجة انا اللى كلامى عبث وخربشات جنب قصيدتك ياواد عمى...دمت لى ودام قلمك

الرائع القدير/عادل عوض
انا حاولت اخدك معايا الصعيد وافرجك على نجع صغير من نجوعه..ولقيتك لافف الصعيد اكتر منى
دمت لى ايها القدير

يامصر ياما الهوى خدنى وودانى
جمال وياما حديت ع السكة وحدانى
ساعة الشدايد انا دمى فدا لبلدى
وابيع فى وقت المحن جملى وفدانى
***********************************
القدير حسن الجمال....مرورك ابهجنى....دمت لى ياصديقى

الشاعر الكبير/يسرى حنفى
لا املك الا ان اقول مرورك اسعدنى ياسيدى ...دمت لنا متألقا دائما

الشاعر القدير/رأفت المصرى
لا اجد المفردات التى توفيك حقك ياسيدى...والعبارات تهرب من بين شفتى ولا استطيع ان اتشبث بعبارة كى اعقب على تعليقك المبهج....دمت لنا ايها المبدع

الجميل القدير الاصيل/محمد عبد الواحد
انت شاعر اصيل ياسيدى ....شاعر من زمن جميل جاء فى عالم بغيض ...لذا تهتم بالاصالة وهذا يدل على معدنك ايها الجميل

الكبيرة الجميلة /عزة الزرقانى
دائما انتظر تعليقك ولمساتك الاخيرة التى تجعل قصيدتى تلمع وتزداد وميضا
.......دمتى لى ايتها الرائعة

القدير الاستاذ/ صلاح الكومى
لقد حصلت اليوم على اعلى شهادة تقدير بتعليقك الجميل الذى ابهجنى ...وخاصة انه جاء من شاعر قدير فى قامة صلاح الكومى......شكرا لك سيدى

اخى الشاعر عادل صابر
اعتقد ماقرءته هو من فن شعر الواو والذى يجيده اهل الوجه القبلى ومتأصل فيهم اليس كذلك
حقيقة قصيدة رائعة ولأنى مغترب مثلك فإننى قرأتها أكثر من مرة وذلك لصدق الإحساس لديك سلمت يدك ولاحرمنا الله من هذا الابداع

القدير الرائع/طاهر الصوفانى
دائما انتظر تعليق المبهج ...لانه بالنسبة لى فى غاية الاهمية وخاصة انه من مبدع راقى كبير متمكن فى قامة القدير طاهر الصوفانى....دمت لى ايها الجميل ودامت ابداعاتك وتعليقاتك المدهشة

الرائع/ طاهر طاهر السنباطى
اشكرك سيدى على تعبك معاى ...وتعليقك الجميل وسام على صدرى
هذه ياسيدى ليست فن واو ولكنها رباعيات عامية تكون قصيدة ذات وحدة عضوية واحدة ولكنها شبيهة فى تركيبتها الفنية من فن الواو مع اختلاف البحر الشعرى ...دمت لى ايها الرائع

أين أنتم ياأعضاء المنتدى؟

يامن تعلمتم وعلمتم؟

إنه مظهر من مظاهر عدم الوفاء ونكران الجميل لهذا المنتدى العظيم هجركم له بهذه الطريقة!

في أنتظار معاودة نشاطكم مرة أخرى

أخوكم

طارق منيب