25 يناير ( مليون سبب وسبب )

الحكاية لها مليون بداية
وأهم ما فيها النهاية
من زمان واحنا صغيرين
يعنى من سنين
والظلم ف كل مكان
وف كل مطرح جريح
وف كل بيت أحزان
كانت متاهة وفيها عايشين
نحلم بزمن تانى وصابرين
والظلم بيزيد عناده
فاكرنا ورثه وعباده
وان خيرنا حقه
وان لحمنا زاده
ولا حد بيرده
ولا حد بيقوله ليه
واللى يتكلم يكتب نهايته بايديه
من غير ازاى وليه
الفقير مكنش لاقى اللقمة
كل كام سنة مرة ان اشترى هدمة
وكل سكة يمشيها يلتقى ضلمة
ويقولوا معلش بكره تفرج الأزمة
هو احنا ناقصينك ولا لك لازمة
بطل بقى بطر وارضى بالنعمة
وكأنها بلادهم واحنا عبادهم
يابااااااااااااى ع الكبر والعظمة
الفقير كان بالتيلة يلقى لقمته
والغنى خضرا وسالكة سكته
وبطل يعد بيوزن ثروته
هيعد ايه ولا ايه
الا قولى يا صاحبى
المليار ده يطلع شكله ايه
يطلع قد ايه


صحيح شكله ايه
يطلع قد ايه


معرفش
أنا أخرى ورقة ب 100 جنيه
أنا شفت الورقة أم 200 قلبى انقبض
وجيبى حلف ما هى بايته فيه
ياااااااااااه ع الوجع
اللى كان مالى قلوب الناس
بس تقول لمين
هو الظالم يعرف الاحساس
فالح يدوس على قلوب عطشانة للفرحة ما التقت
وف عز احتياجها للضحكة سرقها ف بكت
ونسى ان ربك ما ينسى دعوة المظلوم
وانه لازم ينصرها ف يوم
حتى وان طال المدى
ده مقدر وهيكون
واهو كان
وطلع الفجر وبان
وخرجت مصر كلها تقول لا
للظلم
لا
للقهر
لا
لليل
لا
ما احلى النهار ما احلاه
واتجمعوا ولادها ف الميدان
لاهزهم انس ولا هابوا جان
صرخوا صرخة حق
واتحدوا ف كيان
كيان واحد ع الظلم والطغيان
وسطروا لها تاريخ جديد
وحققوا الحلم اللى كان
شايفينه الظلمة بعيد
وقالوا لها يا سمرا افرحى
ابتدا الزمن السعيد
ابتدا الزمن السعيد
واحنا شبابها الحلم الجاى
لجل بلادنا ما ترفع راسها
ما تقولش عمرها أى
مانقولش صعب ومستحيل
الحب مش بالكلام
الحب محتاج دليل
محتاج اللى يعشق نهاره
وينسى الليل
لاجل يكون بكره لينا
لاجل يكون بكره جميل

شعر / أحمد صلاح محمود
ahmedsalah124@yahoo.com