حب اليومين دول

هي : عطشانة .
هو : وأنا كمان .
هي : يعنى ... عايزة اشرب!
هو : أكيد مادام عطشانة يبقى عايزة تشربي .
هي : المفروض – بما أن عندك إحساس يعنى – إني لما أقولك عطشانة تجيب لي حاجة ساقعة .
هو : ومين اللي هيحاسب ؟؟
هي : أنت طبعاً .
هو : منين ياحسرة .. ماانتى عارفة الكانز وغطاه .
هي : ماقلتش عايزة كانز .. كفاية إزازة صاروخ .
هو : طب لو هاتجيبى اعزمينى معاكى .
هي : يابنى أنت مابتحسش ، وبعدين بقالنا 3 ساعات ماشيين ، أنت مش ناوي تقعدنا ولا إيه؟
هو : عندك الكورنيش كله .. اختاري الرصيف اللي يعجبك .
هي : قصدي تعزمنى في مكان شاعري .
هو : في الحر ده .. ماينفعش .
هي : بلاش دى .. نأخد مركب عالكورنيش .
هو : المراكب بتغرق اليومين دول .. خلينا ع البر أحسن .
هي : بلاش المركب تعالى نأكل ترمس .. أظن ده رخيص .
هو : إنتى تضمني منين إن الراجل غاسل إيده وغاسل الترمس .
هي : أعوذ بالله .. إنت مقفلها كده ليه ؟؟
هو : بصراحة معييش فلوس .
هي :يا سلام!! .. ماأنت كان معاك إمبارح .
هو : إمبارح دخلت سينما مع بنت حلوة كده فالفلوس خلصت .
هي : بنت حلوه ؟؟!! وبتقولها في وشى .
هو : أكذب عليكى يعنى .
هي : لأ .. تحرق دمى أحسن .
هو : أنا مش شامم ريحه شياط يعني .
هي : يخرب بيت البرود .
هو : برود إيه ؟؟ ماهو الجو مولع أهو .
هي : إنت اللي بارد .
هو : بارد إزاى ؟؟ دا أنا بشُر عرق .
هي : بقولك إيه .. روحنى .
هو : أروحك ؟! هو إنتى ماتعرفيش تروحي لوحدك .
هي : آآآآه .. طب أنا ماشية .
هو : ليه يا حبيبتي؟؟
هي : حبك برص .
هو : والله برص بيفهم انه حبني.
هي : بجد كده كتير .
هو : كتير إيه ؟؟
هي : إرحمنى .. واضح إن الحر بيجى معاك بالعكس .. يا بارد .
هو : يعنى مصممة تمشى ؟؟
هي : أيوة وحالاً كمان .
هو : طب استني لما نوصل آخر الشارع .
هي : اشمعنى ؟؟
هو : أصل أنا ساكن هناك .. و مايرضكيش أروح لوحدى .
هي : لااااااااااااااااااااااااااااااااااااااااااااااااا ااااااااااااااا....اااا.اا.ا............
هو : ينفع كده ترمي نفسك في الميه مين هايوصلني بقى

ده مش حب اليومين دول

ده غُلب اليومين دول

دمك زى العسل ياوردة حمرا وصبرك غلب أيوب
أضحك الله سِنك
لك أحلى الأمنيات

وداد الهــــــــــــــوارى

الوردة الحمراء
اجمل تحية على هذه القصة التى عبرت عن موقف ماقبل الثورة الرائعةلشباب وشعب مصر لان كل شيئ
كان مستفزاحتى الحب ولكن الان سيكون كل شيئ له طعم ولون
دام ابداعك وتقبلى موفور التحية