الرسالة الأخيرة الى حسنى مبارك

إوعى تزعل
هوّ ده الوضع الطبيعى
وانت أكتر حدّ يعرف ..
غضبة الشعب الجريح
عارف ان الريح ساعتها بيقلع النبت الشيطانى ..
يقلع الصبار ويقلع ..
سطوة الحنضل.. ويقلع برضه أشباه الورود
وانت وردة ..
بس راح منـْها العبير ..
و(الشوك) حاصرها
كنت خدها من قاصرها
واترك المركب لقبطانها الجديد
ماانت من باب العشم ..
(اللى كان فى غير محله) ..
ابتليت الشعب برعاة البقر ..
وبقراصنة ..
وبعباقرة ف مصمصة عضم البلاد
كان حقيقى (كل خرم ف مصر بيفيّـّص فساد)
كان طبيعى ان البخار يصعد لفوق
ويفك طوق أصبح مصدّى
فاوعى تزعل
إنت ترس ف آلة بتعانى الصدأ
صعب تتحرك لوحدك للأمام
إنت متحاوط بكفار الوطن
يستحيل انك تصلى بهم إمام
هو ده الوضع الطبيعى
وانت مش أول ولى ..
يتهد فوق راسه المقام
فاوعى تزعل
واعرف ان اللى انت قدمته لبلادك من ورود ..
مش هيدبل بين قلوبنا ،
مش هينداس فى الميدان ،
أما شوكك ..
فـ اتعمل لك تاج وحاوط جبهتك
واتنسى الورد القديم
فاوعى تزعل ..
لما تسمع فى الميدان مليون نديم ..
ينكروا الشمس اللى طلت من سواد ليلنا بإيديك
واما تلقى الكل بيحمّـل عليك كل الخطايا
واما ترحل زى نجم بيتحرق
واما إسمك يتلعن من جنرالات الأرصفة
فاوعى تزعل ..
لو تموت عز الحيا
أو تعيش من غير حياة
أو تكون بعد التوهج فى الوطن ..
نقطة ضلام
قلت لك من بدرى حاسب ..
لـ الحيتان سدوا البحيرة ف وشنا
قلت لك طالت إقامتك
والعروش ماتحبش اللى ينام ممدد
والشعوب ماتحبش الضيف التقيل
فاكر اما قلت لك :
جيت اجرب حريتى قلت لآمون :
العهد طوّل
والرعايا نِفسهم يمشوا ف جنازتك
قام حالفلى مايمشى غير لو جاب وريث ..
ياخد عزا كل الرعايا ؟
كنت خايف م اللى هيشوفه الميدان
كنت عارف ان بكره .. غير زمان
ايه اقول لك بعد ما فات الأوان ؟
مابصراحةالوقت مااقبلش انى اهاجمك
كان هجومى ..
وانت ماسك سيف ودرع
لكن الوقت الشهامة تقتضى منى السكوت
لجل يفضل شعرى فيك (فارس نبيل)
وانت رغم الكبوة فارس
بس للأسباب دى لازم تنهزم
وبأمانة ..
كان منايا نودعك ..
بالتحية العسكرية
أو نقول لك حتى شكراً ع اللى فات
بس يظهر فعلاً انك ..
مش أعز من السادات
فاوعى تزعل

خالص الشكر لك أخت رشا
تقبلى تحياتى

أخى الحبيب / عادل سند
ياخسارة
لم تعلق على الشعر وطرحت آراء بديهية
وهذا ظلم للشعر
نحن فى منتدى ادبى اخى الغالى
وليس فى صالون ثقافى أو مدرج جامعة
وأنت شاعر كبير وتعرف أن الناقد ليس من حقه مناقشة الافكار والتوجهات فهى ملك المبدع وحده
بل عليه أن يتعاطى النص من الناحية الفنية فقط
وأنا حينما وجدت فى مكان آخر زملاء يجادلون بشكل غير منظبط لم أدخل الصفحة ولم أعد أرد
لكنى أتكلم معك أنت لأنك أخ حبيب
وبيننا مساحة ود تسمح بالتلاقح
أرجوك أخى الغالى
فلندع الجدل جانبا
واننتبه الى أننا شعراء ولسنا محللين سياسيين
وأنا مصمم أن أقرأ ردك (على الشعر)
وأنا سعيد بتواجدى معك
تحياتى