تعظيم سلام ( لكل عناقيد الضى ف مصر ) أشرف الشافعى

تعظيم سلام

( 1 )
تعظيم سلام لمصر ست الكــــــــون
أنا روحى عاشقة ترابها فين ماأكون
دمى وكيان بعشقها مسكــــــــــــون
وهى مهد العشق والعشـــــــــــــــاق
( 2 )
تعظيم سلام لكل بيت فيكــــــــى
ولكل حضن حنـــــــون مدفيكـى
ياما قلت من أحاسيسى ح أنفيكى
لكنى بارجع احنـّلك واشـــــــتاق
( 3 )
تعظيم سلام للجيرة والعشــــــرة
دهب وماس برلنت مش قشـــرة
وشوش بريئة لاخاينة ولا كِشرة
قرب وخدلك درس ف الأخـلاق
( 4 )
تعظيم سلام لكنيسة مع جامـع
ولكل حارة وناصية مع شارع
هما اللى جابوا فجرك الطالــع
توأم ف لون الـــــدم والأشـلاء
( 5 )
تعظيم سلام يا أمــى يا بهيـة
تلاتيـــن سنة بيجربوا فيـــــا
واما طالبت بعيش وحريــــة
عايزينى أرجع عتمة الانفاق

( 6 )
تعظيم ســـلام ياما اتنبح صوتنا
ماتقتلوش الرحمـــــــة ف بيوتنا
إزاى نعيش ومافيش تمن قوتنــا
قالو لنا ده الموجود بلاش ضوضاء
( 7 )
تعظيم سلام ريحة الفساد فاحــت
والشعب فى صخر التعب فاحـت
جتتنا من نار الشــــقا ســــــاحت
طردونا بره وبصوا باستعــــــلاء
( 8 )
تعظيم سلام ياعم فوق واصـحى
بطن الوطن جابت عيال ناصحة
قولناها بالعامــــــى وبالفصـحى
وان كنت داء ربك جعلنــا دواء
( 9 )
تعظيم سلام لكيبورد مع شاشـة
فضحت نوايا خاينة غشــــاشـة
وقلوب مريضة حاسـة بهشاشة
سارقة عرقنا وهى أصل الـداء
( 10 )
تعظيم سلام لقلوب بشر صــادقة
قالوا نموت وتعيش ماهش فارقة
لكن حنحمى بكره م السرقـــــــة
ومافيش فروق لا ف دين ولا أسماء
( 11 )
تعظيم سلام لحفيد وأب وجـــد
ماخافش لكن قام وخدها بجـــد
مين اللى قال الثورة ملك لحــد
غير الكرامة مافيش أمل ورجاء
( 12 )
تعظيم سلام يا بنت مصــــــــرية
قلتى لحبيبك مهرى حـــــــــــرية
سندى وأمانى ف دنيتى الجـــاية
علشان ولادى يشوفوا خير ورخاء
( 13 )
تعظيم سلام لبنات مع ُصبيـــــــــــــان
من غير رصاص ولا آلى ولاعُصـيان
طلعوا المظاهرة يرفضوا الطغيــــــان
ويقولوا للظلم الطويل إلغــــــــــــــــاء
( 14 )
تعظيم سلام لحشــــود بتزرع ضى
طلعت تقابل فجـــــر بكره الجـــــى
وماهمهاش ضرب الرصاص الحى
مارد غضب حطــــــم قيوده وفـاق
( 15 )
تعظيم سلام لشباب جمعها مصــير
زوّق هتافها ميت ميدان تحــــــرير
هانت خــلاص وماعدش باقى كتير
بقى صعب تانى نتحــَـــــــكم بغباء
( 16 )
تعظيم سلام يا مصر يا معانـدة
مالناش ميول سياسية وأجنـــدة
ولا لينا شوق نعمـل بروباجاندة
وماتسمحيش لعبده بيه مشـــتاق
( 17 )
تعظيم لـُحر ماعامش مع موجــة
ماسرقش حلم ف معمعة وهوجة
ولا قال كلامـــــه بنية معووجــة
علشان يبان ف نشـــــرة الأنبــاء
( 18 )
تعظيم سلام اللتْ ليه زايد
مش ناقصة حد يفتى ويزايد
وقت اللزوم كنا وهـج قـايد
بلينا ريقها بنهر من ترياق
( 19 )
تعظيم سلام ياغالية لا تخــافى
قهرك لا كان مدارى ولاخافى
لكنى كنت باقوّى ف كتــــافى
علشان أغيّـر م الألف لليــــاء
( 20 )
تعظيم سلام للى وقف راجــــــل
بعد اما جاله بيان هروب عاجـل
قال لو كرامتى حابيعها بالآجــل
إيه فايدة إنى أكون من الأحيــاء
( 21 )
حرس ســلاح لمحمد البطـران
اللى أهان الخــسة والخــسران
نوّر بدمه عتمة الأوطــــــــان
ولاهّمه أمر هـروب ولا إعياء
( 22 )
تعظيم سلام للى نجد فجـــــرى
وألف لعنة على اللى قام يجرى
وسابها للســافل وللغجَــــــــرى
علشان يخرب كافة الانحـــــاء
( 23 )
تعظيم ســـلام للى حمــــــا عيلتى
وف غيبتى عن وطنى سند ميلتى
وانا بره مصر لقيتــــــــه ُضللتى
وعيالى وعياله ف حضنه سـواء
( 24 )
تعظيم سلام للى رفع راســــــنا
علشــان ف وقت الشدة يحرسنا
ولا ميت نظام تانى حيخرسنـــا
بدراعنا نحميها مـن الغوغـــــاء
( 25 )
تعظيم سلام يالجان ياشـعبية
قولى للجبان اللى خلا بيـــــا
مااحناش عيال هايفة وسلبية
مصرالحضارة تصد أى بلاء
(26)
تعظيم سلام ياعســـكرى ف جيشى
يابنى واوخويا وصاحبى وشاويشى
واكل معايا ف ملحـى وف وعيشـى
وحامينى ف الشارع و ف الـُقشلاق
(27)
تعظيم سلام يا ابو الشهيد ياعنيد
قدمت إبنك للشهادة سعــــــــــيد
شيلته بإيديك ف زفـة الزغاريـد
وقلت باقى اتنين لمصــر فِـــداء
(28)
تعظيم سلام ياكل روح طاهـــــرة
خرجت عشــان تفدينا ف مظاهرة
قدرت تفك الكــــــــــــرب والقهرة
مبروك عليكو ياخيرة الشــــــهداء
(29)
تعظيم ســــلام ياسويس يــاولاّدة
ياللى الأصالة فى معدنك عـــادة
واخـــدة المقاومة فريضة وعبادة
طول عمــر شعبك للميدان سباق
(30)
تعظيم سلام ياماريّا ُضمـيهم
أملك حيتحقق على إيديهــــم
أيووه عليكى وانتى وسطيهم
دينك خلاص بيسددوه بوفـاء
(31)
تعظيم سلام يامصر ياأصيلة
لمى عيالك واعـــدلى الميلة
كشفوا الولاد المكــر والحيلة
وكفاية عشنا سنين ف زيف ونفاق
(32)
تعظيم سلام ياجاهين يا أستاذنا
ياللى لغنـــاك صقفنا وانحازنـا
نجحوا الولاد يحـلـّوا ألغــــازنا
دلوقتى قال عنها التاريخ ماشاء
(33)
تعظيم سلام بيقولوا بعناكى
وقبضنا فيكى وجبة كنتاكى
والله لو دلوقتى سبناكـــــى
ليسلموكى بكره للاعــــداء
(34 )
تعظيم ســـلام يا نيام ف ماسبيرو
ياللى لابتحســــــــــوا ولا تغيروا
سبتوا الميدان ورفضتوا تصويره
وعرضتوا برنامج عن الازيــــاء
(35 )
تعظيم ســـــلام ياربنا هـــوّن
كام ألف وش إصـفـر واتلوّن
حيا وأشاد لكن رجــــع خوّن
من بعد ماقبض التمن بسخاء
(36 )
تعظيم سلام يانجمنا ضَــــــوّى
إيه يعنى طلقة ف قلبى حتدوّى
لحظة مخاض الحلم بتقــــــوّى
وان ُمت انا مـآمن بأى قضاء
(37 )
تعظيم سلام ياما نشــــــوف لسه
ماهو مش جديد ع الغدر والخسة
طيب لو احنا (( قلــــة مندســة ))
مين اللى يبقوا الخونة والعمــلاء
(38 )
تعظيم سلام عللىّ الهتاف عللىّ
وانا ف الميدان حقى حيوصللى
مليت خلاص م اللى بيحصللى
ومش حاصدق كلمة فيها ريـاء
(39 )
تعظيم سلام خللىّ الهتاف أقــــــوى
الظلم زاد واستشرى واستقــــــــوى
ومافيش ف قلبه لا رحمه ولا تقوى
والطاغى مهما يعيش مصــيره فناء
(40)
تعظيم سلام ياســـاحة التحــــرير
أسفلت أرضك ريش نعام وحريـر
ومهما تانى رجعت انام ف سرير
دايماً حاحن ارجع أبات ف خلاء

تعظيم سلام
تعظيم سلام
تعظيم سلام
أشرف الشافعى
جــــــــــــــــدة
2011/1/28

أخي الكبير

أشرف الشافعي

دائمآ أنتظر كتاباتك

كي أبدأ بالكتابة

فانتظرني قريبآ جدآ

بالرد على رائعتك

الله عليك يا عم يا شافعي

أخوك الصغير

عمرو زيتون

تعظيم سلام اخى اشرف لتلك العوده

الرائعه المنتظره .

قصيده جميله خرجت من بدافع الغيره والفرحه للثوره الشبابيه

التى شرفنا بالقيام بها .

عود حميد ونورت المنتدى اخى اشرف .

مودتى وتحيتى ..

» انت مسلم والا قبطي
» تعظيم سلام لمصر
» المستشار القانوني لسكان أشرف: نطالب بأن يقع سكان أشرف تحت ا
» للعشق عناقيد قلبي
» سلام