رحلة إلى الجيش

رحله إلى الجيش

رحت بنفســــــــــــــــــــى على التجنيد *** قلت فى بالى الصحة حديد
نحمـــــى بلادى من التهديـــــــــــــــد *** بهمة قويه وعــــــــزم أكيد
نرفع رايتك عاليــــــــــــــة يا مصر *** طول ما إدينا الإيد فى الإيد
نبنى حضارة تزين أراضــــــــــــــيك *** نغذى أروحنا بعلـــــم مفيد
قلت سلاحى قالــــــــــــــوا حـــــــدود *** ليه يا حظى بيك موعود
حظى خليفتى فى كل مكــــــــــــــان *** قالى سلاحك هو حـدود
يالا ياجندى شـــــــــــــــــــــد الحيل *** وارفع اسمـــــــك للتخليد
بس إزاى والحـــــــظ معايــــــــــــا *** بينى وبينه عناد ووعيــــد
تضحك ليا الدنيا فى حزنـــــــــــى *** وتبكى عليا فى يوم العيد
حتى الدمعة بقت حيرانـــــــــــــــه *** أصل صاحبها فكره شريد
ننهى حوار الحــــــظ معايــــــــــا *** أصل الحظ يسوق فى عناد
يخدم صاحبه ببلوى عظيمـــــــــــه *** ليها أساس عريض وعمـــاد
خدنا شويش علــــــــــى التدريب *** لونه أسمر شكلـــــه عجيب
باين هم الدنيا فى وشـــــــــــــــه *** عنده فنون فـــــــى التعزيب
حلق الشعر على الارضيــــــــــه *** بقى منظرنا كلـــــــه عجيب
يا ما سهرنا ليالى طويلــــــــــه *** دوقنا المر فــــــــى التدريب
ربنا ارحم منــــــــــــــــى عليا *** علم بيا فرجــــــــــــه قريب
ننشر بين أصحابى البسمــــــــه *** نمسح دمعــــــــة كل حبيب
طول ما سلاح الصبر معايــــــــا *** عمر ما شمس الحب تغيب
قالوا حدود مصر الغربيـــــــة *** قلت يا عينــــــى والله بعيد
زور صحراء مصر الغربيــــــــة *** واحة سيوه بالتحـــــــــــديد
فيها أبار وتراث وحضـــــــارة *** كل من خيرها وانت سعيد
قلت وداع للظلم يا قلبـــــــــــــى *** هتعيش حر بشكـــــل جديد
إيلى بنيته قصور فى خيالــــــى *** هدمه الميرى بظلـــــــم شديــد
يا ما كنست القطر الحربــــــــى *** قالوا عليا إنــــــــــــــــــى عنيد
وإيلى يعيش فى الميرى ياجندى *** لازم قلبه يبقــــــــــــــــى حديد
بس إزاى والجوع دوخنـــــــى *** عطشان والجـــوع عندى بيزيد
فين أيامك والله يا قلبـــــــــى *** كنت بترمـــــــــــــى الأكل بعيد
عشت أيام ع السلك الدولى *** قلبى حزين والفكــــــــر شريد
خايف منى حاجة تعــــــدى *** أدخل سجن واروح فى حديد
يالــــــــــــى الميرى مستنيك *** روح فى بحور الميرى وعوم
لو خوفتك منه يا صاحبى *** يبقى عليا والله اللــــــــــــــــوم
لكن كلمه وهنقولهـــــــــالك *** أيام مــــــــــــــره ومش هتدوم
أنا بستأذن من إيلى سمعنى *** ننهى حوار الميرى قـــــــــوام
أصل الأهل كمان وحشونى *** نفسى نروح علـــــــــــى الأقدام
نفسى ندوق السمك البلطى *** أنا للحمــــــــــــــــة كمان خدام
نفسى نريح جسمى شويه *** نفسى نحلم نفســـــــــــــــى ننام
نفسى نشوف الجنس الناعم *** وبعده نروح حتى الاعـــــــــدام

[b
]هههههههههههههههههههههههه
زجليه رائعه وباسمه وواقعيه
وبها من الحواريه
ما يسعد القلب
دمت ودامت روعتك ايها الرائع رضا توفيق
دمت بحب وابداع
[/b]

الاخ الشاعر

رضا توفيق

بعد كل ده . وتقول له :

لو خوفتك منه ياصاحبى .. يبقى عليه والله اللوم

ههههههههههههههههههههههههههه

دا انت كده بتقول للى رايح اوعى تروح .

هههههههههههههههههههههههههههههههه

وصف رائع للمعاناه بس اكيد فى حب الوطن كله بيهون

سلمت شاعرنا الرائع/رضاتوفيق

تقبل مرورى المتواضع على كلماتك

الاخت الشاعرة / عزه الزرقانى
شكرا لكلماتك الرقيقة
دمت بكل حب

الشاعر القدير / عادل سند
انا مش عاوزهم يقولوا إنى السبب فى انى أكرهم فى الجيش
تحياتى ولك خالص حبى

الشاعره الجميلة / بسمة الورد
كله يهون فعلا فى حب الوطن هو فيه حاجه مصبرانا غير حب الوطن
شكرا لمرورك لكى منى أجمل باقة ورد لأحلى بسمة ورد

» الجيش المصرى
» الجيش ماهوش حبة رتب
» معنى الجيش
» سكة سفر ..رحلة رقم 3
» دستور الجيش الجديد