علشان كده قرر يستعبط

علشان كده قرر يستعبط
*****
هو اللي متبت ع الأحلام اللي بتدبل
وسايقلك عبطه فى دنيا ما بتسميش على حد
مستني الزمن الحلو
يغير طعم المر اللي ف بقه
ويشد الجلد
اللي إتكرمش من طولة العمر
بيبص على العصافير اللي بتتنطط ع الشباك
بص العيل للخمسين قرش اللي ماسكها ف إيده
فتحس ف عينه إنه ماشافش الدنيا وهي بتتغير
وإن سبرتاية الشاي
اللي فاكرها من النص الأول ف حياته
بقت زي البت بتاعته
ذكرى لأشياء مش موجودة
وإن الدمع اللي بيتشخط على رمش عينيه
أكبر من بنت أخته اللي بقت فى سنه تالتة تجارة
وإنه خلاص
بقى زيه زي الأنتريه المدهب اللي إتكسر ع السطح
وإنه مرايته الكدابه
فضلت مديه ضهرها للدنيا اللي بتتشقلب من حواليه
وإما إتكسرت فجأة
لقى نفسه فى وسط الدنيا ماهوش فاهم حاجة
علشان كده قرر يستعبط

الرائع سليمان الزهيرى
تحيتى لجمال حرفك وفكرك الواعى واسلوبك المتفرد
وبقولك
ماهولازم
يستعبط برضو
ويقول هاى
امال يعنى
يعيش ازاى
ولا ح يسيتنى
لما الدنيا تقوم
ويشاورو عليه
أخلع بيباى

كلام جميل

بس من حقه يستعبط

الاستعباط احياناّ يفيد .

بدليل .. الجرايد بتتكلم .. والبرامج بتقول .

والمظاهرات ماليه الشوارع بتطالب تبقى زى تونس .

لكن عامل انه مش هنا . ومش من المنطقه العربيه بحالها .

الناس دى مش حاتفوق إلا لما تصحى الصبح وتلاقى الشعب

بيحاكمها .. تفتكر اليوم ده قريب ؟؟؟؟؟؟؟؟؟؟؟؟؟؟؟؟؟؟؟؟؟؟؟

» علشان تبق مصر
» علشــــــــــــــــان كده
» علشان بلدنا
» علشان تعود
» علشان نعيش