الأصول

سبعيــــــــــــــــــــــــــــــــــن سنه
لما يابويا الشعر شاب !!
وبفرشته رسم الزمن على جبهتك
تجاعيد ألم ..تجاعيد فرح ..تجاعيد عذاب
لمعة عنيك أثر السنين
فوقهم على الننى ضباب !!
حتى الحروف متكسّره
فوق الشفايف م العتاب
والورد فوق خدك دبل
منقوشه فيه كل الصعاب!
سبعين سنه
وانت اللى كنت بتعافر هناك
وانت اللى كنت بتسافر كتير
وقلوبنا بتسافر معاك
يابو قلب أنعم م الحرير
راح فين جمال عز الشياب ؟
قلبك كبير بيلمنا
ويضمنا عند اللزوم
الضهر من شيل الهموم
كل وتعب لما انحنى !!
الكلمه من بقك عنب
كل الفواكه ف الونس بتشدّنا
دمك خفيف
يابو ضحكه تشبه للنسيم
ف أحّر صيف !!
رغم الكبر لساك جميل
كما نجم ساطع جوه ليل
بتنام كتير حكم السنين
ف الفجر بتقوم معجزه
قبل الأدان
تسمع آيات الذكر والقرآن
من يوم ما عقلى استوعب الأشياء
وانا بلقاك تصلى الفجر حاضر
من زمــــــــــــــــــــــــــان !
ترجع تولع منقدك
وتكح كل البيت يقوم
وتقمّر العيش الطرى وتصب شاى
تاكل رغيف وتغمسه بالملح ابوكمّون
جميل !! يا ننى صادق ف العيون
عمرك ما خنت ولا افتكر
إنك تخون !!
فلاح بسيط قلبك حنيّن فيه سكون
ف عنيك يابويا الحب كون
بالقاله جوّه عنيك انا
ميت ألف لون !!
واكمنى آخر العنقود تعود
تسأل وتطمّن كتير وتودنى
جواك حاجات بتشدنى
معنى الابوه والحنان
معنى الامان
والعيله والإحسان كمان
وحاجات كتير قلبى الكبير بيحسّها
زى العبير !!وانا مهما اقول
كل اللى قلته يادوب
ده جزء من الأصول
جوايا معنى كبير أوى
أكبر يابويا كتير أوى
من أى قــــــــــــــــــــــــــــــــــول !!
طلعت سالم
أرجو الإشتراك بهذه القصيده فى مسابقة المنتدى عن شهر يناير
فى شعر العاميه وكذلك قصيدة ..إتوحدوا ولكم منى كل الحب

اخى عادل
القصيدة تتواجد يا عمنا فى العامية
و نأخذ الرابط فقط
دمت بخير

عندما يبلغ الإبداع مداه

ويتعدى حدود الإبهار

تعجز الكلمات عن الرد

فاسمح لى بصمت ومكوث

تحياتى لك ولمن أنجب من هو مثلك

سلام

الاستاذ الشاعر الجميل / طلعت سالم
ياللروعة والجمال ف وصفك العالى الحس والتصوير البارع
عندما تقول :
ترجع تولع منقدك
وتكح كل البيت يقوم
وتقمّر العيش الطرى وتصب شاى
تاكل رغيف وتغمسه بالملح ابوكمّون
جميل !! يا ننى صادق ف العيون
عمرك ما خنت ولا افتكر
إنك تخون !!
فلاح بسيط قلبك حنيّن فيه سكون
ف عنيك يابويا الحب كون
بالقاله جوّه عنيك انا
ميت ألف لون !!
أحييك يا أخي على هذا الابداع لجميل
لك الشكر

عندما يبلغ الصدق مداه والحب منتهاه فأنا عاجزعن وصف سعادتى
بردك البليغ المفعم بكل هذا النبل دمت لى صديقا وفيا وشاعرا نبيلا
العزيز الغالى فؤاد ابراهيم

الشاعر الأستاذ طلعت سالم

يا لها من كلمات جميلة

تعكس مدى وفائك لأبيك

فى جمال وصفك لصفاته الجميلة

وعشرته الطيبه

وأحساسك به

أدام الله عليك برك بأبيك

فى هذه الروعة الخالصة

من الإبداع

الشاعر الجميل الاستاذ طلعت سالم

سعيد وربي بان صافحت هذا العمل الرائع

تلك المشاعر الجياشةحولتها برقي فكرك

الى عمل أثار مشاعري لاخر حد

الصدق كان عنوانا رئيسيا وهاما هنا

أحييك على عملك الرائع الصادق المبهر

كل الامنيات الطيبة

تقبل خالص الاحترام والتقدير

الاصول

الاصول