أرض الحر شعر:حسن السبيري

*** أرض الحر ***
شعر / حسن السبيرى

قاعد فى الضلمه
بدارى
من خوف معشش
جوايه
صوت عالى بيصرخ
فيا
واقف مكانك
فاشل . . . ضايع
وهتفضل كده
فى الدنيا
تايه
ناس كل يوم
بيشفوك
وهيفضلوا كده
يدهنوا . . . وينفقوك
وانت فى مكانك فى الدنيا
تايه
ومحدش . . . لامك
ليه انت . . . فمكانك
خايف لبكره تثور
عليك نفسك
وتفوق
***
صديق واخ وانسان
لبسلك
فى الضلمه
عفريت
عشان عارف ممعكش
كبريت
تولع ويبان
خفت من الدنيا . . . والزمان
عشان كل مابص
بعينى . . . قدام
اشوف صورة ابويا
البسيط
راجع من الغيط
تعبان
الساقيه والطنبور والمجرى
علامات بتجرى فى دم ابويا
الغلبان
الارض عطشانه . . .
هات الفاس . . .
افتح التحويله . . .
ياهمام
أبويا يقوم يصرخ من نومه
كابوس كل يوم
ولا يوم راح فالنوم
***
مندوب العمده يخبط
عالباب
هات المعلوم يابوهمام
لسه ياشيخ الغفر
لما اجمع المحصول
وهيكون عندك فالحال
مين يامه شيخ الغفر؟
وايه المعلوم ؟
نام ياهمام عشان تروح
مع ابوك فى الفجريه
أروح مع ابويا الغيط
اللى رواه بدمه
عشان بكره يفك همه
***
الواد هراس
يجرى وشايل المداس
الحق يابا
أمى وقعت فى الدار
تعبت من كتر الهم
والعيشه المرار
رفع امى على مصطبه
قدام الباب
وراح يجيب حلاق
***
أمى تندهلى
تعالى ياهمام
لو عايز تأكل بلح
لازم تطلع النخله
وعشان تطلع
ماتخفش من الشوك
ولا تعد السلالم
إيه النخله ؟
وإيه السلالم ؟
يامه انا منضاق
قطع كلامنا الحلاق
ابقى هات المعلوم على الدار
يابوهمام
ربعه وتلات ترطال
***
شيخ الكتاب
يخبط عالباب
أيوه يأبو همام
أبقى هات المعلوم عالدار
بقال الكفر
يأبو همام
ابقى هات المعلوم عالدار
أبويا يهلوث فى نومه
ألارض – المحصول – ألمعلوم
كابوس كل يوم
ولا يوم راح فالنوم
ووقتها عرفت أن المعلوم
دم
وعرق . . . ابويا
وخلص المعلوم
قبل ماينحط فى الدار
كبر ابويا
وراحت صحته
ومات على كوم تراب
فوق أرضه
وجات الديانه
اللى سلبوا
دمه . . . وعرقه
يزايدوا على ارضه
***
أكبرت و كرباج
شيخ البلد
شوى ضهرى
و فاس اليوميه
قتل صبرى
شغال أسد الدين
من كدى
ومن يومها عرفت
معنى أرضى
***
نصيحة أمى رنة
فى ودانى
سبت البيت
وهجرت الكفر
ورحت اتعلم
فى أظهر مصر
صورة ابويا مش مفارقه
خيالى
جانى فى المنام
وقالى
يهمام
لازم ترجع أرضك
من تانى
صحيت على صوت عالى
الأرض - المحصول – المعلوم
***