للراحل الشاعر الكبير جدي "مأمون كامل"

وجالك قلب تمشي بعيد
وتهاجر بلا عوده
تسيب الشارع الفاضي و عمود النور
تسيب دارك وكتب الشعر والرويات
وانا طيب تسيبني لمين ؟
**********
لا عارفه العين تدوق دمعك
ولا قادره متبكيشي
ولا راضيه تشيل صورتك من الخاطر
عشان خاطر عيون الليل
تجيني الليله في منامي
وتحكيلي عن السبعين
وكيف كانو
وعن "نِشوه"
وعن فلاح في زعج الأرض
كان مأمون وكان كامل
يكملني
ومين غيرك يا وش السعد يسعدني
ومين ياجي لحد الدار
يشج عليا ويشوفني
ومين غيرك يواسيني ومين غيرك يرسِّيني
ومين غيرك ومين غيرك ومين غيرك
ده انا معرفش من غيرك غير الحكايات
لا عارفه الكلمه تكتبنى ولا القافيه
ده بالعافيه
خيوط الحبر بتشاكس سطور ورقي
وترسملي غطا بردان على سريري
انام تحتيه
واضم رموشي
تتسابق مع جفنى على الأحلام
تشوفك عيني ف منامي
فإما تجيني وسط الليل اشوف طيفك
يا إما أجيك
وافوت أهلى وافوت الدار
واكون جنبك تكون داري
ولا تداري عنيك عنى
ولا تحرمنى من شوفتك
يا سارح ف البلاد وحدك

*************