الفاتحة لعم السيد

الفاتحة لعم السيد

من يوم ما خدت الضحكة الحلوة
ومشيت
وأنا رافض أدخل لك بيت
الحياة من غيرك ما تنطاق
حبة صمت على حبة بكاء
وأنا تايه من غيرك مش عارف
وغير كلمتك الحلوة مش شايف
ومحتار أروح فين ولمين
فاكر قعدتنا الحلوة ف رمضان
أول ما يهل الشهر وهلاله يبان
كنا بنجرى عليك
تتلم العيلة حوليك
نقعد نعمل دايرة نهزر وناكف فيك
وتسوى لنا بايديك الشاى
ماهو قلبك طارح حنيته ف ايديك
من رضا ربى يا عمى عليك
اه ياعمى السيد
يا أبو قلب حنين طيب
من يوم وعيت ع الدنيا وانت شقيان
تصحى م النجمة تصلى الفرض
وتتوكل ع الرحمن
شايل فاسك على كتفك
ولو كنت ف يوم تعبان
وان قلنا لك مرة ارتاح
تتنهد وتقول
( يابنى الأرض نعمة
وبيها يبقى لنا كيان)
ولا حد يقدر يعصاك
ما العيلة ماشية بيمناك
مين يقدر على غضبك
واحنا بنتمنى رضاك
وما تخرجش قبل ما تطمن
على مروحنا الكتاب
ونصحى من أول ندهة م احناش
حمل عتاب
وياويل من يهرب مرة
ولا يقول يا غياب
الا مرواح الكتاب
خلى البركة ساكنة الدار
خليها تحميك م النار
وتعيش دايماً فى النور
وحياتك تبقى نهار
رحمة ربى عليك
يا أبو قلب عاش للحب
وعمره ما عرف أسرار
ف العيد
كنا بنضحك على روحنا
وندارى جروحنا
قال ايه بنعيد
خدت الضحكة الصافية معاك
وما سمعتش صوتنا أما جرينا وراك
ونادينا بعزم ما فينا عليك
قلت كفاية خلاص محتاج أرتاح
طب واحنا يا عمى ازاى نرتاح
ازاى يطلع بعدك لليل ده صباح
مش عارف
بس أنا عارف
انى لما أشتاق لك
أجى وأقرا لك الفاتحة
فتطل بروحك على قلبى
تمسح كل الحزن الساكن
وتملى حياتى أفراح

كلمات / أحمد صلاح محمود
ahmedsalah124@yahoo.com

اول مرور على قصيده في غاية الإحساس تقبله أخي العزيز الشاعر الكبير أحمد صلاح محمود
قصيده رائعه بجد ولكن أرجو مراجعه الوزن مع صاحب الميزان الحساس الدكتور صلاح الطاهر مشرف صفحة العاميه

ولك جزيل الشكر

الشاعر الحبيب

احمد صلاح

تكلمت وطرحت قصة عم السيد .

وعم السيد هنا يمكن ان يكون الرمز الذى

استخدمته للرجل الطيب الصالح والذى ينظر الى اسرته

كوطنه والى ابنائه كطرح يزهو به ويفتخر .

عم السيد موجود فى كل بيت .

نشكرك على قصيدتك ةالتى تميل الى النثريه .

مودتى وتحيتى ...

كلمات جميله تحكى الكثير

أتمنى لك المزيد من الابداع

دمت بحب

بداية جميلة

تحياتى[i]

» بتمنى
» قصيدة ( براءة )
» اللى غايب
» أهلا ب السيد الزرقانى
» لِـعـبـتـَهـا صَـح