آآآآآآآآآآآآآآآآآآآآآآآآآآآآآآآآآآه يا بلد

إنسان مصري جعان غلبان طهقان لكنه يزرع الحب برغم كل شيئ برغم استيراد كل شيئ ودمار كل شيئ الحب قبل كل شئ فتعالوا معي نسرد صرخة اليوم
صنع في الصين

جدو حكالي عن بنوتة
ف ميلادها اسمعنا الزغروطة
تفرح وتقول توتة ياتوتة
حلوة ياجدو ومش ملتوتة
جدو حكالي عن بنوتة
ليها عروسة وفيها حجرين
لماتغني بلادي بلادي
تهتف وتقول تحيا الصين
فينها عروستي وصنع بلادي
أفرح ييها أهتف وأنادي
ليكي الحب الغالي وفؤادي
وأما أكبر أهديها لأولادي
وأحكي لهم أجمل حدوتة
جدو حكالي عن بنوتة
تصحى وتفطر بعد النوم
وتكمل بنشاطها اليوم
طفلة بريئة ف وسط هموم
حتى ف أيام شهر الصوم
اصحى يا نايم صح النوم
فين فوانيس أجدادنا اليوم
جدو حكالي ياليلي يا عيني
والنضارة الصيني ف عيوني
بيها الدنيا هاتبقى غيوم
وبنستورد حتى التوم
والسرطان ف بلادنا يدوم
نقعد نسهر تحت التوتة
نكتب من تاني الحدوتة
مافيهاش تاني أجمل بنوتة
فيها أيامنا صراخ وأنين
كله تمام وصناعة الصين
--------------------

ثم همسة عتاب لسادة القوم وأصحاب الجلالة
يا حكومة الجيب نضيف
يا حكومة الجيب نضيف
ومربي لنا الخفيف
في شتانا وفي الخريف
دا الجيب أصبح نضيف
رحمة لصرخة أنيني
من خصخصة الرغيف
وارمي السلام يا عيني
ع الحر وع الشريف
لو قلت تعض قلبي

قلبي أنا أصلا ضعيف
هاتكون ظالم لسنة
لو يوم عضت رغيف
وأكيد هاتكون بريئة
دا الجيب أصبح نظيف
لو سعدك يوم زمانك
قول للدكتور نظيف
قول له بلغة الإشارة
يا مربي لي الخفيف
مش بالبشاميل باحلم
ولا بالشتا والصيف
في الصف أنا واقف أحلم
أحضن لي أنا كام رغيف
آخد لي معاهم صورة
واتغطى وأنام خفيف
------------------------

ثم لحظة يأس مع خيوط الفجر
ما بين يومي وبين أمسي
خيوط الفجر ناسياني
وبين ألمي وبين يأسي
بكأس المر ساقياني
أصالح في الهوى نفسي
وأقول يا صبر من تاني
تضيق بيا الليالي تطول
أقول راضي بحرماني
وترجع بالزمان على طول
سنين العمر من تاني
أدوبها في ألامي وأقول
في قلب جراحي جارحاني
---------------------------ثم نوم عميييييييييييييييييييق وأحلام

شفت منام واحترت انا فيه
شفت وطنا بكل ما فيه
خلق بتبني وخلق بتهدم
خلق بتغلط ولا تتعلم
خلق بتكره يوم تتقدم
شفت منام واحترت أنا فيه
كل الدنيا آهي بتتقدم
والمبروك عقله ف رجليه-----------------

ثم الاستيقاظ في الصباح والصلاة والشفافية
أرواح شفافة
نجوم الليل بتتصافى
تميل ع القلب يتشافى
مابين أرواح بتتلاقى
لقا للروح منين ماتروح
سنابل للوفا والبوح
بتوصف لون جمال الروح
ملايكة وطاهرة مشتاقة
لبحر الخير بترمي هموم
وتخرج فضة لئلاءة
ورب قلوب جمعها يادوب
بكل الحب تتلاقى
-----------------
ثم الاستيقاظ مجهول الهوية
يا مين يلقاني
يا مين يلقاني وأدي له تلاتة جنيه
بواحد يشتري شقة ويعمل بيه
وبالتاني يسافر برة ميت مرة ويرجع ليه
وبالتالت يكون يكون خلا
مافيش خالص حاجة ف نفسه
لكن مين يمسك الدخان
ويصحى في الهوا السكران
ومين بيطير بلا جنحان
--------------------
الخصخصة
يا بلادنا وقسموكي
واتوصوا بيا أنا
يا بلادنا وخصخصوكي
للأخ وللضنا
يابلادنا وقسموكي
وبقولها من هنا
مش عاوز آخد صكوكي
هافضل فقير أنا
وبلادنا تضمنا
مش عاوز أركب شيروكي
هاركب حمار أنا
---------------
رغم كل هذا المشوار نار بين الضلوع وفقر واستهتار لم لن ننسى أننا أمة المختار والصبر يعمر الديار فيغزل لنا مصابيح الحب ليمتزج الحب بالمعاناة بالالم بالجرح ويصرخ صرخة من القلب آآآآآآآآآآآآآآآآآآآآآآآه يابلد
آه يا بلد
أه يابلد قلبي ده حبك
واتمنى بفضل يوم جنبك
سألوني والله ف يوم عنك
واحلفت إني أسير حبك
وآه يا بلد قلبي أنا حبك
وإن قالوا ابني جعان
والله زادي إيمان
زارع الرضا جوا ف أرضك
علشان كده قلبي أنا حبك
حبك ورغم أنينه
في العالي والله جبينه
غزل الأمل من طينه
ورواه بدمع حنينه
باحلف بربي أنا وربك
آه يابلد قلبي ده حبك
ضميني أنا شوية ف حضنك
أبوس ترابك مع أرضك
أوهب أنا عمري لعمرك
بالمولى أنا قلبي يحبك
والدم ده شوية عليكي
عاشق يروحي دايب فيكي
يا مصرنا ... الله عليكي
مسلم مسيحي دايب فيكي
وإيدينا تحضن في إيديكي
تغزل من النور خطوايكي
ويرد لي الروح عيد نصرك
آه يابلد قلبي ده حبك [b]
monkey

رائع هذا الحس الوطني الذي لديكِ شاعرتنا الجميلة محاسن
ورؤية متأنية للواقع المصري الأليم
وصرخة من مواطن مصري أصلي
تقبلي مروري

مريم كتب:: رائع هذا الحس الوطني الذي لديكِ شاعرتنا الجميلة محاسن
ورؤية متأنية للواقع المصري الأليم
وصرخة من مواطن مصري أصلي
تقبلي مروري

ما أجمل أن أستنشق عطر وجودك يا مريم هنا فقد تشرفت بك في حب الوطن وصباح الفل على عيونك أختي مريم Shocked

معايشة الاحداث والإمتزاج مع هموم الوطن

هو الشاغل الوحيد فى مجموعة القصائد التى قرأتها

حس عالى ونقد للأوضاع التى هوت بمجتمعنا وأخلاقنا

احييك وتقبلى مرورى وتحيتى ..

حلوة خالص وكلماتها سهلة ومش معقدة وتدخل القلب من غير اكسكيوزمى ولا بليز

آآآآآآآآآآآآآآآآآآآآآآآ يابلد
الشاعر الرائعهة / محسن بيومى
دمت ودام ابداعك وحسك الوطنى القوى
مساؤك زي العسل
مودتى
ليه مانزلتيش كل فقره على هيئة قصيدة منفردة ؟
ولا انت عاملة حساب الضرايب؟
هههههههههههه

آآآآآآآآآآآآآآآآآآآآآآآ يابلد
الشاعر الرائعة / محسن بيومى
دمت ودام ابداعك وحسك الوطنى القوى
مساؤك زي العسل
مودتى
ليه مانزلتيش كل فقره على هيئة قصيدة منفردة ؟
ولا انت عاملة حساب الضرايب؟
هههههههههههه