أنا هنتحر لمنتدى تحت المجهر

أنا هنتحر

نظرا لأن العيشة صبحت مستحيلة
ولإنى مستحملش الغربة ليلة
أنا هنتحر
مش هنكسر وأستنى أموت
بالمختصر ...
أنا ناوى إنى أنتصر
ف المعركة بينى وبين الموت
وأموت بكيفى
وأهى فرصة يتقسم رغيفى
على مراتى وابنى
وقبل ما يغلبنى موتى أغلبه
وأكسر غروره
أطلبه
وانزع جدوره اللى زارعها جوه منى
من يوم ما عينى فتحت
وانا حاسس إنى أتولدت عشان أموت
وسنين تفوت وألقانى لسانى هنا
عشرين سنة وتلات سنين
وأنا لسه ببنى تربتى
ومستنى موتى
وسكوتى فارش سكتى ذل وهوان
إحساس جبان ...
إنك تلاقى فرحتك
محبوسة جوة تابوت
ويأسك يمنعك تفتح لها
وعشان تعيش لازم تموت
والعنكبوت ...
عشش خلاص جوه الفؤاد
ومفيش خلاص
من خيط بيقتل فرحتك
ما هى قسمتك تفضل كده
غرقان ف بحر من الدموع
ومفيش رجوع
والجوع شيطان
مالك زمام المعركة ومكتفك
شاهر سيوفه مخوفك
وبيعزفك ضحكة شجن
بيعرفك ...
إن الزمن ملهوش أمان
وإن اللى كان أيام زمان ينفع يكون
دلوقتى تاهت سكته
وملهوش مكان
وإن البيبان متقفلة
ومفيش بيبان بإيديها نفسها
بيعرفك ...
إن الأمل موجود ما بينا
وإن الليالى نفسها
تصبح نهار
فبسرعة حدد موقفك
وإن كنت فاكر إن فكرة الانتحار
راح تنصفك تبقى حمار
الانتحار ...
راح يضعفك
الانتحار مش انتصار
الانتصار إنك تعيش
وتحارب الخوف والظروف
الانتصار انك تعيش متخفش شىء
إنك تشوف قلبك جرىء
راسم طريق مفروش ورود
رغم المصاعب والمخاوف والجمود
تلقاك سعيد
الانتصار ...
إنك ترجع اتسامتك للشفايف
وتعيد زمان الممكنات
إنك تصحى فيك بطولتك
تعلن الصيان عليك
وتحارب الخوف والسكات
الانتصار ...
إنك تمّوت الانتحار جواك وترضى بالحياة
إنك تعيشها بحلوها وبمرها
متقولش آه
الانتصار ...
إنك تعيش حاسس بروحك
إن تشوف بوحك نجاة
وإن اللى تاه منك رجوعه مش محال
ترسم أمال
وف رسمتك تلقاك قوى
أقوى من الجوع والوجع
الانتصار ...
إنك تعيش مش بس تبقى مستمع
الانتصار ...
إنك تقول وتحس نفسك
إنك تحس بقوتك
إنك تحسك
إنك تحس الكون
وكونك يبقى حاسك
الانتصار ...
إنك تشيل الانتحار من حسبتك
فالانتحار مش هو حل المشكلة
المسألة ...
إنك جبان
حاسس بإن الانتحار هيخلصك
بالمختصر ...
الانتحار يعنى انكسار
فإن كنت عايز تنكسر
ويخلصك
روح انتحر

**********