ببتعيش على حب " النت"= محمد خضر الشريف

بتعيش على حب " النت"
شعر:محمد خضر الشريف
Smile

أنت خيالي.. وبس..
دي كلمتها ليا
في ليلة حلوة قمرية
نجومها بتضحك لكلامنا
وتتباهى يمشاعرنا
في جو السما الواسع
سهرنا فيها الليل كله
وخلصنا الكلام كله
لحد ماطلع علينا الفجر

وقالت بعد ما يئست ..
من حب دام له سنين
كان بين ولد وبنت:
وشكلك كدا هوا..
هتفضل كدا هوا..
الناس تتقدم وتخرج لبره
وأنت "مكانك سر " بس لجوه
بتعيش على حب" النت"

وقلتلها أنتي السبب ياست
سديتي عليا طريق الحب
وطلبتي مني عشان أتقدم لك مليون
وقلتلك ساعتها دخلنا في لعبة الملايين
اللي معمري حلمت أني أعدها عد
وقلتيتي برضه في يوم
و تدفع مهري من عمرك
عشر سنوات برضه تعدها عد..
وتستنى ولابريحة الحب تتهنى
إذا أهلي ما وافقوا علي شرطي
وعلى من يناسبهم ويسعدني
ساعتها بس أفكر فيك ويمكن
نفسي تطاوعني وأرضى بيك.

أفكرك لو كنت ناسية
مش دا كلامك ليا ياقاسية..
بيدك أنتي بنيتي جدار عازل
وسويتي كأعدائنا الملاعين
هناك في بلاد القدس
بنوا بينا جدار عازل
وقالوا نغيظ الناس
ونخنقهم في المنازل
ونقلقهم في معيشتهم
ننغص عليهم نومتهم
في ليلتهم وراحتهم
ونغيب عنهم شمس ضحوتهم
ونقضي على أشكالهم
وأنسابهم وأنسالهم
ونهدم عليهم مزارعهم
متاجرهم.. منازلهم
وكل كوخ طالع ونازل
ونقطع رقاب العوازل..

تأوهت وقلتلها
في آخر كلامي
يابنت الناس ياتعباني
قلبتي على أوجاعي
وطفيتي فرحتي جواي
في ليلة حب قمرية
كنت أنا وأنت نعيش الحب
ونتعشي بالحب على ضي الحب
وبعدين فيك يعيني؟
سؤالها ليا من تاني..
ومن تاني قلتلها:
بيدك أنت تسقيني
وترويني من كؤوس الحب
وبيدك أنت ترمي طوبتي
وأروح أمشي أشوف حالي
وهنيالك يا بنت الناس هنيالك
بغيري يوريكي فنون الحب
وياخدك من إيديكي ويمشي
يروح بيكي لأخر حارة حب.

بس ياخسارة وألف خسارة
لأنك هتلاقيها "حارة سد"
متزعليش مني يا أجمل حب
ولاتاخدي على خاطرك
لأني أنا اللي سديت حارتك
وفي آخر الليل قفلت بيبانها
بضبة حديد وباب خشبي كبير
نزعته من مغارة علي بابا
وغفت الحرامية الأربعين
وجريت شايله في شارع
عندنا اسمه الاربعين
وقوة جاتني مش عارف منين
ياقوة الله أكررها وأنا ماشي
أشيل باب يشيله أربعين.
ايوه بعاملك بالمثل..
ياسارقة مني أيامي
وعمري كله وأحلامي..
وأجمل مشاعر حب
لأنك بصراحة وزي ماقلتلك
في أول كلامي قبل شويه
أنت اللي بيدك ياقاسية
سديتي علي طريق الحب.

موضوع جميل استاذ محمد

ولكن النثريه لا تتركك

تحيتى لك وروعة كلماتك

دمت بحب

وربي أنت بنت حلال مصفية
لسه بكتبلك أقولك أهو ياست عزة، كتبنا عامي لما نشوف بتوع دكة الاحتياطي يقدروا يكملوا الماتش في الملعب العامي ، ولا بتغيريهم وتطلعيهم من الملعب؟؟
مساء الفل على ست الكل.
تحياتي العطرة لشخصك النبيل.

محمد خضر الشريف كتب:

وربي أنت بنت حلال مصفية
لسه بكتبلك أقولك أهو ياست عزة، كتبنا عامي لما نشوف بتوع دكة الاحتياطي يقدروا يكملوا الماتش في الملعب العامي ، ولا بتغيريهم وتطلعيهم من الملعب؟؟
مساء الفل على ست الكل.
تحياتي العطرة لشخصك النبيل.

محدش يقدر يطلعك م الملعب استاذ محمد

بس اللى انا متأكده منه أنك عندك قصائد عامى جميله

وممكن تكتب عامى رائع

دمت بكل خير وحب

أشكرك ياست الكل، وزينة الكل وريحانة الكل
على حسن ضيافتك ليا، وكرم احتضانك لكلماتي المتواضعة ديا..
ولو شايفة ان النثرية غالبة عليها والوزن فيها ،يعلم بيه الله، نحولها نثر عامي مفيش مشكلة ؟

صباح الفل لفت نظري اللقب خضر فأنا أيضا خضر بس شرقاوي فقلت التشابه يستوجب التعليق
ههههههه
صباح الفل كم هي كلمات رشيقة وخفيفة في الصباح هي كالفهوة وعبير الزهور

الاستاذ الشاعر

محمد خضر

كلمات صيغت بشاعريه وإن إفتقدت الوزن

تقبل مرورى وخالصمودتى ...

إلى الشاعرة" الخضرية" محاسن بيومي
طبعا كل من ينتمي للبيت الأخضر لازم يحنوا لبعض في الشرقية ولا الغربية والمنوفية ولا الصعيد ولاحتى في أخر الدنيا، هما يعني أصحاب البيت الأبيض دول أحسن منا في ايه بقه.. عننا "بيت أخضر"زي ما هم عندهم" بيت أبيض" مفيش حد أحسن من حد يعني.. . ههههههههههههه
صباحك نادي وليلك معطر بالفل والكادي..
شكرا لتعليقك وتواصلك الحلو.

الشاعر الحبيب والكريم في ردوده لمحبيه
أستاذ / عادل سند..
كنت خلاص بشيلها من هنا وأوديها أي مكان تاني لأني خفت صاحبنا عاطف الجندي يقولك عنها:"العامية إلا قليلا" وقلت اوديها نثر أو أي مكان تاني وخلاص.
لأني بعتها على طول، فور الانتهاء منها، ودي عيبي بقه مستناشي أراجع واشوف الوزن كم كيلو، وقلت لو مش عاجبهم "يوزنوا بره" ههههههههههه
لكن لما شفت ردك الحلو زيك، قلت يكفيني هو ورد الحلوين الكمل قوي عادل سند وعزة الررقاتلي ومحاسن وكل الأقمار الجمال قوي في المنتدى.
لك ودي ياغالي.

» !قس قذر = شعر: محمد خضر الشريف
» سلامات أخى محمد خضر الشريف
» استطلاع رأي = محمد خضر الشريف
» يا قدسُ !! =شعر : محمد خضر الشريف
» مات القمر !! شعر: محمد خضر الشريف