امثال الجدود

قال الجدود والعم
امثال كتير وحكم
من كتر قول الفم
حافظ كلامهم صم
وعشان ما يتبخرش
هاتوا ورق وقلم
وعشان ما يتنتورش
لمُّوا اللى راح يتلم
وعشان ما نتحيرش
ارموا اللى فيه الغم
*****
العمر عمر العقل
والسن مش بالكم
والشاب شاب القلب
والشيبه مش بالهم
والخفه مش فى الشكل
الخفه جوه الدم
ان دبلت الورده
فيها العبير يتشم
*****
ولكل فول كيال
بس أوعى يوم تتخم
فول اتقسم نصين
لمين شبيه فى الدم
اردب ما هو ليك
ما تجيش في كيله يا عم
يملى العفرمعاليك
والخير حيقلب غم
****
الضحكه ليه طالعه
صفرا فى لون كركم
السن دا بالسن
والبادى الاظلم
والقشه فوق القش
ضهر البعير تقسم
واللى عمل يوم خير
مايجيله يوم يندم
واللى النهارده امام
مسيره يوم يتأم
****
انا وبن عمى نكون
سوى ضد اى غريب
ونا ويا اخويا اكون
سوى ضد ابن العم
****
ابعد بعيد ع الشر
وغنى له تسلم
والشهره راح تمتد
نار فوق العلم
والوز ابنه يعوم
لو غرقوه فى اليم
دارى الشموع حتقيد
نورها يزيد ويعم

******
مين حب ما يكرهش
والحب يتنغم
والكُره ما بيدومش
والحقد راح يهدم
والحب جوه القلب
مش غنوه قالها الفم
******
سهم الحبيب ما يصيبش
لو غرقوه بالسم
الدنيا كاس بيدور
يسقينا فَرْحْ وغم
****
وجعان فى سوق العيش
بايت وبيه يحلم
والأكل لجل نعيش
والعيشه مش للمم
الدنيا أكل وشرب
عند البقر وغنم
واللى بيطبخ سم
لازم يدوق السم
****
راح تجرى جرى وحوش
رزقك وبس تلم

*****
عروسه راح تنزف
والناس لها بتتلم
دموعها نازله ترف
دى دموع فرح مش غم

******
لو مات حمار عمده
الناس عليه تتلم
ولو يموت هو
ولا حد بيه يهتم
*****
بيقابلك الصاحب
بالحضن يخدك ضم
تضحك لك القوره
وكلام جميل الطعم
لكن دى الصوره
شايله وراها اللغم
في الوش دا مرايا
فى الضهر تلقي السهم

السلام عليكم .. مجرد راي
كلام من قلبي
الأستاذ الشاعر / رافت توفيق
احترامي وتقديري

الله
رائعه دائما كلماتك ، سهله الوصول الي القلب ،
عالية الدقه في التكوين ، غالية المعني والمضمون ،
صادقه في ما حكت عنه بأسلوب الشاعر الأصيل ،

سعيد بمروري الأول علي كلماتك الرائعه
تقبل ودي واحترامي
وللجميع تحياتي

الشاعر الجميل رأفت توفيق

كم هى رائعه أمثالك

ومليئه بالحكمه وملمه بأحداث العصر

الحقيقه اشكرك على طريقة صياغتها

وسردها وصورك عالية الجوده

تحيتى لجمال حرفك وابداعك الراقى

واسمح لى بالتنسيق وتكبير الخط

دمت بحب وخير وسعاده

ملحوظه

تثبت بواسطتى لروعة الحرف

الشاعر الجميل

الأستاذ

رأفت توفيق

كم انت رائع ايها الشاعر الجميل

تحياتى لقلمك

الاستاذ الشاعر

رأفت توفيق

جميل ان تجمع هذا الكم من الأمثال الشعبيه

فى هذا الزجل الجميل الذى كتبته ببراعه .

ومهارتك ظهرت فى إدماج المثل فى النص

دون الخلل من محتواه .

احييك على براعتك وزجليتك الجميله .

خالص تحيتى ومودتى ..

نص جميل
و رافى
كتب بحرفيه و قدره شاعر متمكن
تحياتى اخى العزيز

اشكرك اخى الفاضل

------------------

زمان عارض عليك تفرح وتتهنى
وليه قلبك مابينقيش غير الاحزان
وحزن تقيل وحزن خفيف وحزن اخف
تروح ايدك على اتقل ما فى الاوزان
وعجبى!!!!!

» رحلة أرض الجدود
» امثال>>امثال
» امثال شعبية بصور متحركة
» امثال شعبية باللغة الخلفاوية