امي ... صفصافة الجنين

يا الحمام
نقطة ع السطر ... وسلام
خد كفايتك من حروفي
نور وشوق
وانتشي بلمسة كفوفي
و إعلى فوق
أعلى من هم الزحام

أعلى من شوقي اللي هام
واتلضم بين الغمام
بين قساوتي واشتياقي
.... والسنين

أعلى من حتى الكلام
اللي منقوش ف الرسايل
بين هديلك واللي باقي
من بواقي المحرومين

يا الحمام ... لـ ( المتانيا *)شد مكتوبي المحمل
بالأماني والغناوي
لأمي صفصافة الحنين
** ** **
يا الحمام
قول ف أول سطر كيفك
عامل أيه يا أماية وقتك
لسه بتحِدي رغيفك
بالرموش العشمانين
في الرضا ساعة الأدان
لسة بتمدي لرغيفك
غنوة الصبح المبلل
بالعرق وسط الغيطان
لسة بتهادي الجيران
بالخبيز وغموس محبة
والمدى ضلة أمان

لسة بتحني الصبايا
وتخرمي ودان البنات
لسة بتملي الرحايا
سر منطوق السكات
لسة عايشة ف حضن أبويا
رغم بيقولوا إنه مات
لسة بتلمي الحقايق
ع الحقايق م الشتات
لسة بتقولي إبن بطني
الواد محمد لحمه ني
لسة م السقف المشقق
القمر بيمد ضي
يروي مجروح السواقي
حبة نور والباقي مي
تطرح الأرض الشراقي
كسوة العيد اللي جي
** ** **
يا الحمام ...
قول لست الحزن هانت
والأدان قرب ينادي
قول لها البشارة بانت
يمكن الطرح السنادي
بس عارفة ... كني خايف
لليمام تاخده الحدادي
للغيطان اللي الهالوك
فيها قتله الغلة عادي
...عاملة أيه يامة الغيطان
بعد ما دقوا الحديد
آل صحيح طرحت مناجل
بعد ما إتروت مبيد
والنخيل ساعة أما تدن
لسة بيطاطي الجريد
ولا راخر ريحه رخيت
و إتكسى بروح العبيد
أوعى يامة يكونوا ملوا
انتظار بكرة البعيد
أوعى يامة يكونوا ضلوا
وبدلو النيل با لصديد
علميهم زى عادتك
إن فينا شئ وحيد
يوم ما تشتد الشدايد
قلبنا واحد شديد
** ** **
يا الحمام ...
حط ع التوتة العفية
وانده القلب المداوي
واحرتي يا مة القسية
واشتلي صوت الغناوي
فين حواديتك وفيني
صدقيني أنا لسة غاوي
لمة ع اللقمة الهنية
وشربة م القلة القناوي
يا الحمام بالله تهم
بوس إيد أمي وكل أم
أم طه وأم تادرس
كل أم أحضن وضم
قول لست الحزن فرحك
ع الشجر زهر خلاص
قول لها بالقلب سامعك
من زمن سبت(الخلاص)
بس طمعان تبعتيلي
دعوتين متكلفين
من بتوع الفجر يا مة
ينجدوا القلب الحزين
أصلنا ف الغربة يامة
يا مجروحين يا موجوعين
ويا الحمام ... في الختام
نقطة ع السطر ... وسلام