شعرا نص كم

م/عطية شواش كتب:

شعرا نص كم
.........................

وبعنا الحديده

وجبنا بدالها دفاتر عديده

كتبنا وشرحنا

وخدنا براحنا

ولسه القصايد ف إيدنا مريضه

يا خيبة سلاحنا

كلامنا دبحنا

وذاد انبطحنا

مدامت جراحنا

ف مصر الجديده

..........

يا أهل الكتابه

يا أهل الغرام

ومصر القديمه أساس الكلام

ياست الولايا ياعيشه البتول

بينزل كلامنا ويشبع نزول

ويعلا مقامك يا أم الخلول

ف مصر القديمه ودار السلام

..........

يا أهل السقافه

يا أخر الصفوف

كلامكم مرطرط

ومالي الرفوف

وبيركم معكر

وناقص شادوف

مفتح وباصص

وخايف تشوف

وخوفكم سايقكم

بيجري وسابقكم

ف مصر القديمه وبين العطوف

..........

شيطان القوافي

بيقلب معاك

بتكتب قصايد

محبه ف عماك

ومين اللي خانك ؟

ومين اللي هانك ؟

وحمر ودانك

وشمع آفاك

وسايب عساكر

تقطع تذاكر

ف مصر القديمه

ودير الملاك

..........

ياأهل السقافه

يا أهل الفنون

كلامي بيوجع دماغ الزبون

حبيبته اللي خانت بتورة لمون

وحبة جوافه وكيس بر تقان

قعدلي يعيط وحارن يجوع

ينتف رموشه ينزل دموع

عشان الهيافه

وشعر اللبان

بحبك يا زوبه

وحبك مذود عليه الرطوبه

ونايم سطيحه

كإني دبيحه

ونفسي بيدخل عليه بصعوبه

كإني بحبك خالفت العوايد

كإني بحبك بنفذ عقوبه

بحبك يا زوبه عليه الطلاق

وداخل بصدري وقاصد خناق

ولو جابو روما

وبوكس الحكومه

ف مصر القديمه ورملة بولاق

..........

تعيش السقافه

في حضن الحسين

لأن الهيافه

حدانا بدورين

ياشعر الشوادر يا خل الخليل

بتكتب نوادر بدور جنزبيل

كلتكو البرومه

وزيت الحكومه

يلين ضلوعك وبين البينين

ف مصر القديمه وبين السورين

..........

وشاعر وساكن

في حي الذوات

يقول : الغلابه

ويزعل .. ساعات

يا أونكل .. يا دادي

ياواوا ف بلادي

وحخلف ميعادي

بلاها البنات

وحعمل روايه

حتاكل معايا

عن العربجيه

في شارع فؤاد

..........

وواحد بيكتب أغاني الشباب

مقطع هدومه لحد الشراب

يا لهوي يا ماما

حبيبك اسامه

حيعمل حواجبه ويلبس حجاب

خانتني فاطيما

مع احمد طعيمه

وسرقت موبايلي

معاه الجراب

وقولي لبابي

يرجع جرابي

يسلط علهم بوليس الآداب

يا إما يا ديحه

حتبقا فضيحه

ف مصر القديمه وشارع شهاب

..........

وشاعره مهمه

بتاخد مرمه

حبيبها اللي ساقت

عليه الأئمه

يالهوي يا أمه

سي عبده ولما

بيضرب آلو

صباعي بيقفش

وإيدي بتكبش

في صحن الجاتوه

مانمشي إلا سي عباده ياكل

وده من جرايره كل المشاكل

مفيش منه يامه

فلاته وخلاص ؟؟

مضيع فلوسي علي الميكروباص

مشحم هدومه

وعاصني وعاص

قماش المراتب وكل الصحون

ورغم إنه رمه

ورايح يخون

ف مصر القديمه ومجري العيون

..........

يا شعر المناسبه

ياخد الجميل

كلامك بيلسع

قفانا الطويل

تنافق ف ميت

تنافق ف حي

كلامك معفن

وماسخ وني

بتفرد ف نولك

وفارد نسيج

ف مصر القديمه وفم الخليج

..........

بحبك ياشبرا

مصانعك وغيطك

وسكة حديدك

وشحمك وزيتك

وأول فلوسي

قابضها في نولك

فسمعن لقولك

وحقك علينا

عشان إرتخينا

وسيبنا إيدينا تقطع شعورك

رمينا ضفايرك في حجر السكات

ف مصر القديمه وسوق التلات

..........

وجيش أم هاشم

بيزعق بلال

يأدن فتزحف جموع العيال

تهل البشاير في باب الحديد

وتاخد منابها القديم والجديد

تخضر سنابل

وتفرح طيور

وتطلع غلابه

في أول طابور

وتقلع عقارب هدوم الحمام

وتخلع زواحف وشوش الطيور

ف مصر القديمه وسوق العبور

..........

وشاعر بيدن

في سوق التلات

عشان مصر خابت

وجابت بنات

ولايا .. ولايا

ولولا العنايه

بتستر ساعات

لكانت فضيحه

وتملا الصفيحه

نربط بالات

يا أهل المروءه

جايبلك نبوءه

ليوم السلام

لسانك حصانك

فإلزم مكانك

قصاد الترام

حتركب محطه

وتنزل محطه

بلاش الزحام

ونطه ف نطه

لحد المقام

ف مصر الجديده وولع نظام

..........

الشاعر الرائع عطية شواش الف تحية على القصيدة الرائعة وبصراحة مش لاقى كلام اعبر بيه اكتر من كده

أنا لااعلم هل من المستحسن ان ارد وسط هذا

الزخم من الردود ام لا ولكنى اشعر اننى اذا

لم اكتب اليك ردى فسوف اشعر اننى احدهؤلاء

الذين انتقدتهم فى "معلقتك" فارجوك اولا لا

تتهمنا جميعاخصوصا واننى من مصر الجديدة

وبرغم ذلك اقول لك يا أستاذى انك جعلتنى

واناأقرأهذه القصيدة وكأننى استمع للشيخ

امام رحمه الله وهو يغنيها

لقد جعلتنى أعودللوراء وأستحضر هؤلاءالفطاحل

لأجلسهم بجوارك فأنت وبكل تأكيد وان كنت لا

أعرفك شخصيا أنت من هذه النوعيه من الفطاحل

والذين أصبحوا للأسف الآن لبعض "المستشعرين"

دقة قديمة فيا حبذا لو أمتعتنا أكثر

بهذه النوعية من الكتابات التى تصيب بسهم

مغزاها أسرع من غيرها وأكثر ايلامالكى يفيق

النائمون والهائمون و "الخمسة بتعريفة يالمون"

==========

تقبل منى الودوالتحية

أخوك المهندس -مجيب عيد

م/عطية شواش كتب:

عبدالرحمن الشاعر كتب:

الشاعر الكبير / عطية شواش
هذه المعلقة يجب أن يكون التعليق عليها هو :
لا تعليق
ففي الصمت لغة كما يقول الفلاسفة الكبار ، وأراك ستكون منهم .
أكرر
لا تعليق

أشكرك الزميل الشاعر / عبد الرحمن

ياسيدي ولا فلاسفه كبار ولا حاجه احنا لسه فين ؟؟

ممنون لمرورك الكريم .. تحياتي

إنما كتبت ما أرى

وأشكر الاستاذ محمد عبدالله الهادي ، وفرج فودة اللذين كانا السبب في

تلاقينا لأول مرة

وأنا لم أنس حوارنا عن فرج فودة الذي لم يُستكمل ، لو تتذكر