ب تغني لمين ؟؟

موضوع: ب تغني لمين ؟؟ السبت أكتوبر 09, 2010 1:31 pm

ب تغني لمين ؟

1

زى نور الفجر
لما ب يعلن انتهاء الوصل بين العاشقين
كانت عينيك السهرانين
نقلت اشاره برغبتك
في الالتحام ب الخوف
مع إن سكان السما
وافقوا أخيرا
يمنحوك العفو عن كل الخطايا
بعد اعترافك بالذنوب على عتبه التوبة
إنما
كان اللي مانعك م الطواف بالبيت
صوره
متبروزه
على مدخل القلب اللي فاتح دراعه للسما
ب يشتهى الغفران
.......

2

مع أنهم
من زمان استغربوا
ازاى تخلى سمسميه
تعزف الكلاسيك
و شخباطات المشتاقين للنور
ــ ب القلم الرصاص ــ
تغلب الموناليزا
ف ترد ب انسيابية شديدة
تغلب
اندفاع سيل الخجل بين عروق المشتاقات للشوق
- السر ... صنعه
والعشق وحده يقدر
يخلّق من جديد
موناليزا ب القلم الرصاص
ويخلى أوتار سمسميه
تغلب الفيولين
.....

3

وتغنى لمين ؟
والكل متسلّطن نشاز
واصل لحد الشوشرة على وشوشات دق القلوب
الخرّس
أصبح طريقه للخلاص
من تفاهات الكلام
واللسان أصبح وسيط للعولمة في الزمن العجوز
صوت الغنا
بقى زى صوت البحر وسط القاهرة
عمرك ما تقدر تسمعه
غير ف الخيال
حتى الخيال
ممنوع بحكم المحكمة م البوح
مع إن
أسراب الحمام ها تموت
لو حكموا مره بمنعها م النوح
.......

4

و أما الطوفان
أنهى رسالته ف الحياة
طارت حمامه عششت ع البر
فهم اللي أمن ع السفينة
إن الطهارة
أول مزايا المولودين ف الكون
ف بلاش يصيبك الاندهاش
لما تشوف
ابنك المولود جديد
واقف إمام
ب يصلى بيك الفجر
ف القدس الشريف
وما تعتقدش
إن ب وضوءك ف الحرم
اكبر دليل على الطهارة
الرب ما حرمش الخيال
هما اللي منعوا م الغنا
فلا بديل عن السؤال
هو الحمام لساه يغنى للبشر
ولا البشر
حرّموا فعل الغنا على سرب الحمام ؟؟؟

الابن الشاعر الجميل

عمرو شاهين

واضح وضوح الشمس ان النص هو الذى يقيدك

فتسير وراءه الى ان يأخذك الى بر الإمان .

هنا اخذك النص كا يحلو له ونقلك بكل ثقه الى مصاف

الشعراء الكبار والذين يهتمون بالصوره وإن كانت على حساب الوزن

فأخذ شعرهم طريقه الى القلوب . لما يحمل من معنى ومضمون

اربع مقاطع كتبوا بإتقان ومهاره اهنئك عليهما .

ولكن فى النهايه هو نص شاعرى كبير وبه ما تكتب عنه صفحات

تقبل مودتى وتقديرى ...

الابن عمرو شاهين

ليس معنى كلامى ان النص نثرى بحت

ولكن ورغم معظمه كُتب من الرجز إلا انه فى بعض

المناطق إضطربت التفعيله منك اكثر من مره .

هذا للتنويه ولعدم حدوث ليس ...

صوت الغنا
بقى زى صوت البحر وسط القاهرة
عمرك ما تقدر تسمعه
غير ف الخيال
حتى الخيال
ممنوع بحكم المحكمة م البوح
مع إن
أسراب الحمام ها تموت
لو حكموا مره بمنعها م النوح
.......

هذا المقطع الرائع الشاعرية الفلسفى الإحساس والشجن ......... مدهش

شرقى الإحساس والعطر .. بعكس المقطع الثانى الذى يظهر فيه تأثرك بالثقافة والفن

الغربى .

حمداً لله على عودتك بنص بنفسجى الشعور رائعه .

وداد الهــــــــــــــــــوارى

ابويا الغالى ذو المقام العالى الساكن فى العلالى
واحشنى
ثانيا مصاف كبار الشعراء مره واحده و شاعر كبير يستحق تتكتب عنه صفحات ؟
يا ابويا لسه بدرى
وبدرى قوى
بس بامانه كلامك بيشجعنى ان اكمل واكتب تانى ( واغلط تانى )
تقبل فائق احترامى وتقديرى
دمت بكل خير

الاستاذه النبراسه
وداد الهوارى
اولا حمد لله على سلامتك فين حضرتك من مده طويله
ثانيا انا شاكر جدا على كلام حضرتك ليا الواحد فعلا بيطمن لان فيه وراه ناس ومبدعين كبار زى حضرتك
تقبلى فائق احترامى وتقديرى
دمتى بكل خير

الشاعر عمرو شاهين الجميل

والذى يستقل بفلسفته الخاصه

والتى والتى تحكى وتصف

مدى شاعريتك ايها الرائع

وقد ايه ماتقوله وما يحتويه تعبيرك يعد اكبر من سنك كثيرا

وتلك هى الموهبه التى نعم الله بها عليك

تحيتى لجمال قلمك وابداعك المتفرد

دمت بحب

ملحوظه

يثبت بواسطتى لروعة المضمون

جميل استاذ عمرو

الرقيقه والرقيقه والزهره الزرقاء
الشاعره عزه الزرقانى
عندى كلمتين بس اللى انا حاسسهم دلوقتى بعد كلامك ده كله
بيتهيائلى من غيرك ف المنتدى كان ممكن ما اكتبش حرف من الاساس
تقبلى فائق احترامى وتقديرى
دمتى بكل خير

استاذ مصطفى
مرورك هو الاجمل
تقبل فائق احترامى وتقديرى
دمت بكل خير

الشاعر الرائع المبدع

عمرو شاهين

قصيده تحفه غنيه

رسمت بقلمك الذهبى اروع القصائد

الى اخرجت صوره حيه تنطق بمعانى الروعه والجمال

ابدعت فى عمل الاسقاطات لكى تطرح قضيه نعانى منها

جميعا

رائعه كعادتك يا عمرو

وبجد تسلم على امتعنا بكلماتك وبفكرك وبفلسفتك العاليه

فى طرح ما تريد

دمت بكل خير وسعاده

الشاعر الرائع عمرو شاهين

الحقيقة مش عارفة أقول أيه بالظبط دايماً ليك أسلوبك وفكرك الخاص بيك متفرد فى الصورة

رائع فعلاً

ومن أكتر المقاطع اللى لمستنى

إن الطهارة
أول مزايا المولودين ف الكون
ف بلاش يصيبك الاندهاش
لما تشوف
ابنك المولود جديد
واقف إمام
ب يصلى بيك الفجر
ف القدس الشريف

يكمن حسيت بالصورة جداً هنا لما بها من النقاء الشديد

تحياتى لإبداعك الراقى

الصورة لديك يا عمرو هي اجمل ما فى شاعريتك
ففيها الجنون و الفلسفة و التضاد أحيانا
و هى اشياء مهمة للشاعر المتفرد
لكن رغم هذه الموهبة الواضحة
لا أجد سببا يجعلك بهذا الصوت نشاز موسيقي
أكيد هيختفي بعد فترة و اتمنى أن لا تطول
رائعة يا صديقي
دمت بخير

توضيح أكثر
الابن و الاخ الغالي عمرو
أقصد الخروج العروضى لديك مازال موجودا و أكرر يا صديقى لا تقرأ كثيرا لقصائد النثر فهذا واضح تماما لديك و هو ما سيبعدك عن الشعر الموزون فعملك هذا واقع بين النثر و الموزون و هى مرحلة تشبة مرحلة اللا سلم و اللا حرب فى الشعر
فأنت شاعر مؤهل بما لديك من خيال
و شاعرية بأن تكون من مصاف الشعراء الكبار بشعرهم و ليس بسنهم
يا صديقي إخلص لشعرك و أقرأ لغيرك فمن هنا سيأتى الوزن و ستكون أذنك موسيقية تعرف الهنة العروضية و تلتقطها حتى بدون دراسة للعروض
ربما حبى لك و خوفى عليك و لولا أننى أرى فيك شاعرا رائعا ما كتبت هذا الكلام و لكنك تعودت منى على الصراحة و لا شئ سواها
دمت بخير

الاشاعره الرائعه اميره البدرى
يمكن كلامك بيأثر فيا جامد وبيدينى دفعه علشان احاول اطور نفسى اكتر واكتر
شاكر تشجيعك ومرورك
تقبلى فائق احترامى
دمتى بكل خير

الاخت العزيزه والشاعره الرائعه رشا فؤاد
انا اللى مش عارف اقول ايه عن كلامك ده
تعليقك فعلا بيزيد الموضوع نور
تقبلى فائق احترامى وتقديرى

استاذى الغالى
عاطف الجندى
بجد بعد كل الكلام ده
معنديش سوى كلمه واحده وهى شكرا بكل لغات العالم
على ارشادك وتوجيهك
اتمنى ان يجمعنا لقاء قريب للحديث بشكل اوسع
تقبل فائق احترامى وتقديرى
دمت بكل خير

» رشفة واحدة تغني
» طب يسلم لمين
» بكتب لمين ؟
» انت ياد طالع لمين؟ طارق منيب
» قلبك لمين ..