عوض عباس مفتاح

عوض عباس مفتاح
راجل ثرى وفلاح
وعلته اكبر عيله
فى كفر ابو رواح

عنده الفلوس بالكوم
زى الدره والتوم
لا عمره شال فى هموم
وليله كله صباح


ماشى بشرع الله
وفى كل خير تلاقه
بلسم لكلمه اه
والكل ليه يرتاح

عنده تلات اولاد
لطفى وذكى وعماد
هما الدوا والزاد
والحزن والافراح

الاب كان مشغول
العمر مش هيطول
المال دى فتنه وغول
ولاده عودهم لاح

جمع ولاده وقال
لا كنت يوم خيال
بالعلم جبت المال
ولا كنت بيه اهتم

لطفى وعماد الاتنين
اخدوا الفلوس والطين
اما ذكى اللى رزين
اختار طريق العلم

عدت شهور وايام
مرت تسع اعوام
ذكى رجع بسلام
واخواته رجعوا فى هم

لطفى اللى خد الارض
لا طال سما ولا ارض
وبيعوه الارض
وجاتله جلطه دم

اما عماد اغواه
كتر الفلوس وياه
خلصت فلوسه وتاه
فى البودره ويا الشم


ذكى بقى دكتور
وفى القانون مشهور
وقاضى حكمه جسور
يقطع لسان الظلم

والجهل قلب كفيف
ان شب يبقى مخيف
كله خديعه وزيف
وان صاحبه عقل يضر

وادى التلات اخوات
شفتوا اللى عاش فى تبات
واللى بجهله بات
يشرب كاسات المر

العلم نور وسلاح
العلم شمس صباح
العلم لك مفتاح
وتعيش حياتك حر

الزجال
محمد سرور

بحب فن الزجل والله يا عمى
زى حبى لولادى وابويا ولامى
واعشق حروف كلمته
ماشى انا فى سكته
الزجالين والزجل بيجروا فى دمى