دستور يا أسيادنا (أدب ساخر)

الحدوتة الأولى
دستور، يا اسيادنا!
على غرار هاني رمزي بفيلم "عايز حقي"
وقع بيدي هذا الأخضر الصغير
ربما اختاروا له اللون الأخضر تيمناً
بالرجل الأخضر
أو الأرض الخضراء
التى لطالما صدعوا رؤوسنا بها فى أغنيتهم ..
"عايزناها تبقى خضرا ، الأرض اللى فى الصحرا
هيا ايه الصحرا
عايزناها ايه
خضرا"
حينما رأيته وانا اتصفح رفوف الكتب المعروضة ، بمعرض الكتاب
لاأعرف كيف أصف لكم شعوري!؟
لكني ،وبحركة لاإرادية امتدت يدي اليه، تخطفه بحذر من على الرف وانا التلفت حولي " كسارقة دجاج"
ليس لشىء ..فقط شعرت ان الجميع سيسخرون منى لو "قفشوني" اى ظبطوني متلبسه بإمساك الدستور من " قفاه" أقصد من كتابه!
وكوني الوحيدة التى تبرعت ضمنياً، "بالطبطبة او التمليس" على رف كتاب الدستور المكدس، الذي لا يقرأه سوى الناموس، والأتربة ماشاء الله!
حينما أصبح الكتاب بيدي ،بغلافه ذو اللون الأخضر"الزرعي" بدرجة ما قبل الذبول بمرحلة ، وما بعد الإزدهار بمراحل"!!
لاحظت قصر"طوله" وقامته وكأني أنظر بمرآه!
ولسان حالي يردد" طيب كانوا خلوه طويل شوية، حتى عشان يملى عين الشعب"
اما بقية صورة ، الغلاف فقد كانت كالتالي:_
عباره عن قبة مجلس الشعب او الشورى التى احترقت "يا عين امها فى ماس كهربائي كالعادة، واعادوا على إثرها بناء مقر مجلس الشوري، على احدث طراز وصيحة وتجديد وآخر" نيو لوك"
حتى ان بعض المواطنيين حينها ، فكروا جدياً بإحراق قطارات السكة الحديد الخربه، وأبنية قصور الثقافة التى تكاد تتكأ على رؤوس المثقفيين وعلى اجسادهم" وربنا يستر"
وجميع المرافق العامة الآيله للسقوط متخيلين ان هناك مادة ما بالدستور، تنص على أنه..
"يجوز للشعب بناء على تأييد ما لايقل عن 5مليون نسمة، ان يطالبو بتجديد المنشئآت الحيوية، بعد حرقها ،قضاء وقدر، او ان تم تأييد القضية كالعادة ضد مجهول او ضد الماس الكهربائي" الِوحش اللي مستقصد مصر والمصريين"
وصراحة من كثرة الماسات الكهربائية التى حدثت فى مصر وأصابت منشآتها،بدأت افكر، بالمطالبة بتغيير مفردة "ماس كهربائي"
وليصبح البديل المنا سب هو ..ماس عدائي ، أو إسرائيلي"!
رغم انه هذة الفكرة تتعارض بشكل او بآخر مع تصدير الغاز والتطبيع والجدار الفولازي!!
الأهم سأكمل لكم مواصفات عريس الغفلة
يووه اقصد دستور الغفلة
يا جماعة ركزوا "شوية"
اقصد الدستور يا اسيادنا
_ بعد صورة القبة التى يلتف حولها علم مصر ، بنسره ابو أجنحه مشلولة
بمنتصف الغلاف ترقد "أربعة مجلدات" مدرجة من اسفل لأعلى تبعا للحجم
أولهم "مجلد كبير أحمر اللون، يعلوه آخر بنفسجي، يعلوه ثالث أزرق ، يعلوه رابع أصغرهم "أخضر كتب عليه باللون الأبيض كلمة" الدستور"
سبحان الله
لهذة الكلمة رهبة ما تشبه، رهبتنا حينما كنا نسمع بمسلسل الف ليلة وليله القديم
وقع أقدام "الإشكيف" " الوحش الضخم"مع ليلي علوى "المُزة"
المحبوسة فى القفص!!
الأهم دعوني أتم لكم مواصفات "الإشكيف" الأخضر أقصد" الدستور المعطر"
_ بآخر الكتاب وبشكل موازي لصورة "قبة المجلس" يوجد ميزان غريب الشكل، ذو كفةٍ واحدة" أعرج يعني"
او ربما حتى لانظلم الدستور، أومصمم الغلاف
ولأن
مساحة الغلاف صغيرة جدا، وضيقة لاتكفي " يا حرام" الا لكفةٍ واحدة!!
" حينما اخبرت اختي .. أن دستورنا أعرج، بقدم واحدة، يووه اقصد كفة واحدة ... قالت" وبراءة الشعب المصري بعينيها...
"عادي رشا ماهو ميزان الذهب بكفة واحدة، ده دليل ان دستورنا من ذهب وبلدنا من ذهب، ومستقبلنا من ذهب"
"فأكملتها لها على نفس الوتيره
"وذهب مع الريح"
"وذهب ولم يعد"
"وذهب صيني"
والله أختى تندرج تحت بند ثلاثة ارباع الشعب المصري وهو بند:_ " عايش، ومقضيها ،وراضي بااللي فيها، والناس لبعضيها، ومحدش مخلد فيها" !!

تعالوا لنتم تصفحنا للدستور" تحت مبدأ "الكتاب بيبان من عنوانه"
بآخر صفحة الغلاف الأخضر
وضع تاريخ صدور الدستور المصري
كالتالي:_

صادر فى 11 سبتمبر 1971
بتعديلاته
2008
إلى هنا وعيونكم ما تشوف الا النور
حينما لمحت التاريخ المكتوب
وتنبهت له
صرخت " بالصوت الحياني ، الرشروشي"
يالهوي
يا خراااشي
11\سبتمبر
برجي التجارة العالميين
تنظيم القاعدة
امريكا
إرهابيين
يا ليلة ..طين
وبثانية واحدة ،كنت أرفع يدي وأعلن إستسلامي بمنتصف المكتبة
وأنا ابكي...
"انا مليش دعوة يا جماعة، والله مش انا، ده الدستور
لا ده مش الدستور ده الرجل الأخضر" الجزء الثالث"
والله مش انا ده دستوركم ،راكبه عفريت
التصق بيدي"كما نطاط الحيط"
ده انا حتى " أُميه"
كنت بس بتفرج على الصور والألوان!!
دستور يا اسيادنا
ورحت اهز رأسي ، برقبتي يمينا ويسارا ، مؤدية وصلة "زار" عفاريتي محترمة
وانا اردد، بهستريا "دستورية، قانونية"
الله حي ، الله حي
دستور، دستور
موعودة يااللي عليكي الدور
الله حي، دستور رايح، دستور جى
وبعد وصلة رعب، تصحبها رعشة دستورية
قام المسؤل عن الركن السياسي بالمكتبة
بتهدئتي.. قائلاً..
_ مالك بس يا بنتي، ما كنتي عاقلة من ربع ساعة
_ حصل ايه، وليه خلاكي تقربي ناحية الرف ده بس!؟
_ أنتي مش شايفة علامات التحذير السياسية الدبلوماسية الغير مرئية بالعين المجردة
من أتربه وذباب!؟
أجبته باكية..
" معلش والنبي يا عم ، اصل، نظري ضعيف بالواراثة، اول ما شوفت اللون الأخضر ، فكرته كتاب عن الملوخية
وتخيلتها باللحمة والأرانب
ريقي جري ، وايدي على الحلة، يووه اقصد على الرف
ورفعت الغطا، عشان أدوق طعمها
مكنتش اعرف ان العلبة فيها فيل
اقصد ان الحلة فيها "قتيل"!!
ربت صاحبنا على كتفي فقلت له" ايدك لوسمحت، لو عايز تطبطب يا خويا روح كلم بابا، هوه انت فاكرني نانسي عجرم"!!
المهم... بعد إعتذارتي المتكرره
له ولمن يعدوا على أصابع اليد الواحدة من الحضور!!
وجدته يعطيني لفافة بكيس بلاستيكي أسود شاحب!
ويقول..
_ اتفضلي يا بنتي، مبروك عليكي!!
_ الحساب جنية ونصف مصري!
" حساب ايه يا عم الحاج، الكيس الإسود ده جواه ايه بالضبط
وهوه معقوله لسه فى حاجه فى مصر نقدر نشتريها بجنيه ونص بس!!
يارب تطلع "حتة لحمة، افرح بيها العيال"
ضحك أخينا وهو يقول..
ايوه ده بالذات رخيص جداً، وكمان عملتلك عليه تخفيض، لأنك اول واحده تفكر تشتريه!
بعد الخصخصة وبيع القطاع العام
_ خصخصة وقطاع عام!!
ايه يا عم الحاج هوة الكيس ده جواه ايه بالظبط، ليكون جايبلي حتة من عمر أفندي القديم!؟
_ لا يا بنتي ده الدستور، الى انتي اتفرجتي عليه وخدشتي حياء قوانينه
لازم تصلحي غلطتك وتشتريه!!
وهنا عدت لثورتي
وانا اقسم بوجهه
انى مش هصلح غلطتي
والواد اللى فى بطن كفة الميزان، ده
مش ابني
وخرجت من المكتبة" جرياً"
وأنا أهذي ، مؤدية ،وصلة منفردة "لرقصة"
دستور يا اسيادنا
دستور
باعوا بلدنا وعلى مين الدور
باعوا الذمة وباعوا الهمة وباعوا شرفنا
ومش باقي غير الدستور
شوف يا مواطن يلا وبص
دستورنا" الأخضر" بجنيه ونص
دستور يا أسيادنا
دستور