القصه ومافيها

كل ليل

علي حجر السما قمر

وكام نجمه شاهدين علي حسنه

كلّمته

وأما نطق

كلمني عن حزنه

والغنا لما بكي ف القلب

وإنتحب

سألته ليه ؟

سألني ليه ونس اليتامي تعب ؟

والعمر قنديل إنطفي صحبة هواه

ولا فيه حياه ..

ولا فيها روح ..

ولا فيها ..

- مطولش عليكم –

القصه ومافيها ..

كان ليل وكان قمر

وأنا خدت معاه وإديت ف كلام ..

له معني

وكلام مالهوش

عن بكره وعن بعده

والطيبين اللي إتواعدوا

ولحد النهارده ماجوش

العيش , والعيشه

واللي عايشينها

وبنت ماشيه ف مشاكلها

شنكلها غرام

وقعت / من أول نظره

وأول كلمة حب ..

قالت نعيش

والليل بيجري علي حصانه

عنتر زمانه

ومابيدّيش

وتوته . توته

هـ نكمل بكره الحدوته ..

- بس مااكدبش عليكم –

ده مجرد حلم

والأحلام ممكن ماتجيش

الاستاذ الشاعر

مراد ناجح

فلسفتك المعهوده مع مفرداتك الجميله فى توظيف

المعنى من اجمل ما يميز شعرك .

وانتقيت من النص ما اعجبنى فى توظيفه :

سألته ليه ؟

سألني ليه ونس اليتامي تعب ؟

والعمر قنديل إنطفي صحبة هواه

ولا فيه حياه ..

ولا فيها روح ..

احييك على بهاء حرفك وجمال ما كتبت .

وتقبل منى كل التقدير ...