ليليان

ليليان..

ثلاث مشاهد من سيناريوالوجع

بداية.....

.انا الوجع من اول القصة

ولسه صابروعقلي لسه سليم

عمال اراهن ع الحصان ومش عارف

انه اول مرة يدخل سباق......

مشهد (1) فرنسا فيها بنات جدعه

ليلين اول بنت اشوفها

احلف انها اجمل بنت

عيوني شافتها بره بلدنا

اول مره قعدت قصادها

اكتر من ساعتين سرحان ف عيونها

شفت انا فيهم دنيا جميله شفت النار والجنه

بعديها اتمنيت اموت

مشهد2 (باريس) فرنسا بلد الجمال

باريس قالو عنها كتير و تستاهل

لكن فيها نسوان ياما مش حلوة

و بنات بيض و بنات حُمر

و بنات ليهم نظرة تغُر

و بنات اطول منى كتير

لكن كنت بطولهم

ياما سكرت معاهم جدا

من غير ما اشرب نقطة خمرة

كنت افوق اضحك على نفسى

و اتمنى اموت

مشهد 3 ( ليليان مابتكدبش )

حلفت ان انا ليها

و ان انا اول واد حبتنى

و ان عيونى قال سحرتها

قالتلى قدام الماما

نفسها يبقالها ولد يشبهنى

يومها لميت شنطى و مشيت

و رفضت السكنة معاهم

فلقيت على وش الشنطة

كل حسابى اللى دفعته

و لقيت ورقة بلغاتهم مكتوبة

ليليان مابتكدبش

مشهد النهاية

لو كنت اعرف تانى ارجعلك

لكنت رجعت من حالى

لو كنت اسافر حتى مرة

يا ترى ازاى بقى عودها

و عيونها لسه بتسحر

و لا جمال شفايفها بتسكر من غير خمرة

ايام كانت

اجمل حاجة فيها الحب

و عيون لليان الزرقة الصافية

اوحش حاجة

انى طلعت جبان

و مصدقتش

انى راهنت على حصان خسران

و قتها عرفت

ان الدنيا بحالها بتكدب

الا عيون ليليان