لحظـــة طيــــش

ف لحظــة طيـــش

ف لحظة طيش

تعيش الفكرة جوايا

وجوايا مبيسعنيش

ف لحظة طيش

أكون كل الكلام فاهمه

مايفهمنيش

أقول هكتب أقول هقدر

أقول اللفظة تسعفني

متسعفنيش

أصادف وردة مشنوقة

ف بستان الغنا الساكت

فترويني بعطر الموت

حطام روحي تكون أضعف

قصاد موكب من الأموات

سالت الموكب الزاحف

وليه روحي أنا بذات

يجاوبني ...

عشان ميت من الداخل

مشاعر بكرة وامبارح

بتتداخل

وأنا السارح

بهادى العشق ف عيون الغنا أشواق

ببيع الضحكة وعيوني بتنذف داء

وداء الشعر ف سكوته

زمان قالوا

يدوق السم طباخه

وأنا اللى طبخت ما دقتش

ويوم ما فرحت مفرحتش

مقدرتش عيوني تعيش

فلحظة طيِش



فلحظة طيش

قاموس المعني يتبدل

أبات عاجز عن التفكير

ضياع الفهم للواقع

بيفسد لحظة التفسير

كتير أشياء مبفهمهاش

أشوف بعيوني وأتامل

حاجات عقلى ميوصفهاش

حاجات بتموت .. حاجات بتعيش

حاجات تايها ف لحظة طيش



ف لحظة طيش

رسمت الحلم فكتابى

لقيت الرسم تجريدي

بيتجرد من الحاضر

و م الماضي ومن بكرة

بيتجرد من الفكرة

و م الموضوع

فيعكس كل شئ بخضوع

خضوع الفكرة والمعني

خضوع النون بتجمعنا

خضوع حرف الحياة الساكن

يعيش يحلم بلحظة طيش



ف لحظة طيش

يكون الضعف عنواني

وليه سارح ف شرياني

شراع المركب التايه

بقاله سنين

شراع العمر متحير

مبين شطين

يا عود لساك بتتعود

تخالف مبدأ التكوين

تبص لتحت أقدامك

وبتلازم حدود الطين

أنا عارفك ...

وعارف ليه رفضت تعيش

ورافض ليه تقيم طولك

أكيد خايف ....

تعيش اللحظة وتجرب

تموت وانت فلحظة طيش