مركــــب ورق

مركــب ورق

راسية على شط الغرق
مركب ورق
بتنادي أمواج الحياة
والموج بيرسم مفترق
سكة حياة .. سكة نجاه
سكة عدم
سكة وتر
رافض يصرح بالنغم
سكة وشوش متغربة
سكة صبا
وشراع حزين
رحال سنين
سؤال بيصرخ من زمن
من فين لفين
بنحب مين .. بنعادي مين
مليون سؤال من غير جواب
وكتاب يلملم فى الحروف
بصيت لقيت بين السطور
ورداية دبلانة
حسيت بمعني الخطر
والشمس بردانة
وحاجات بننساها
لساها فاكرانا
صورتك يا نور عيني
أول ميلاد للحب
كنا صحيح قلبين
بالحب نصبح قلب
بس الهوا فرق
والهم يتفرق
واحنا بنستسلم
نحزن فنتبسم

ولقيت فقلب الورق
كلمة ومشطوبة
كلمة صحاب الصبا
على بعض بنحوط
من كتر فرط القسا
في الضحك بنغوط
نشعر بكل الدفا
وإحنا فليل طوبة
كلمه ومشطوبة
كلمة ليالي الأمل
والرسم ع المية
رسمة معدية
تعبر لشط الغنا
والغنوة منسية

شايف بعينى أنا
عيل ومات فيا
عيل وكان عمره
من عمر شجرة توت
روحين وكبرم سوا
النبت كان واحد
نبت البراح والهوا
شاب الخضار عودنا
وبعدنا ما عدنا
باقيين على وعودنا
ورجعت يوم حنيت
بصيت على المية
المح خيال الأمل
بصيت على جدورها
مات الأثر فيا
ماتت .... وانا ميت
سامحينى يا عمري
كان نفسي أموت جمبك
متنا ف نفس اليوم
بس الجسد باقي
لملمت أشواقي
ورميتها في الميه
يمكن تحاكيها
تهديها أغنية
فتحت صفحة ( أنا )
فلقتها مطوية
رميت كتاب الزمن
ودموعي فعنيا
فسمعت شئ بيقول
الذكريات بتعيش
وإحنا البشر بنموت
لكن تعيش هيه