(انا وعفريتى) كلام علي ماتفرج

وابتدآ عفريتي اللي ساكن جوايه بوضع اليد

يقوضني يهددني بأنه عليا يقيم الحد

وآنا بين الفراغ والمد

ممدود ومسلوخ من نفسي

ونـِفسي من نـَفسي يخرج

حد غيري فيا ينافسني

يامين فيا يباريني

ويهديني لقولــِة لأ

وللحق

وبعترف بغرور

ولا معذور

وبدال علي نفسي مالف وادور

أنا محبوس جوه نفسي بنفسي

وشرنقت روحي علي روحي

بحرير يأسي

ولما لقتني بغلبني فزعت

ووزعت جنودي علي ابوابي

خايف علي وجعي اللي في جنابي

وآحبابى رافعين بالغدر سكينى

وشياطينى والمتأسلمين علي دينى

مابين الحضور قاعدين

معازيم فى جنازة فرح

بيزغرطولي ترح

وسرح بيا وبيهم تــِعبان الزمن

ولدغني وانا في عقر دارى

ولاداري

واتسرسب السم وسكن دمي

وذاد ألمي وطال همي

وعفريتي اللي جوايه بيصرخ

عايز ينسلخ مني

وانا الباقى علي العِشّره

ومغلولة في الشق صوابعي العَشره

ومش لاقى لنفسى ولا ليـِه ولالياَ

فياَ مكان أمن وحواليـّه

باقي حواسي رفـْـضـّني

وللجني اللي ساكني مواليّة

بايعوه علي هجري وعَاذلـِّيـني

والصبرفاض بي ومعدش بيصَبر

ولا ضامن يطول الوقت أو يقصر

والموت بيداعبني

بيلاعبني

لعب القط ويا الفار

لاغلبته ولاغلبنى

ولاخيار ليا ولامَـــنـْـفـَــذ فرار

ولا قادر اقول الأااااااه

ولابيها مستريح

يااااااااااااااااه

ليه الأااااااه

مابقتش بتريح


(طاهر الصوفاني)