شعب خالد

اهداء الى شهيد الاسكندرية
فقيد الشباب
ضحية العنف و الظلم
ضحية غياب القانون و موت الضمير
رحمك الله ...خالد سعيد
*********

الشعب دة خالد
موش خلود الأهرامات
خالد خلود الشقيانين عبر السنين
او خلود التعبانين المطحونين فى أرض الخوف
زى كل المظلومين جوة السجون
زى ما الغل اتولد منذ الخليقة
أبشع جريمة فى الوجود
لما ابن آدم خان أخوه

يا شعب خالد
زى نحت أدين المخبرين فوق القفا اللى ياما قاسى ما اشتكى
و ف يوم ما قال لأة...ما عدتش حانظلم
ظالم حكم ... قال يتعدم

اللي خايف برضة بكرة حيبقي خالد
واللى مستني السما تمطر جرايد
يقرا يصدق انه شاف خالد
بيبلع ورقة صفرا فيهاشيء جامد

الورقة يابلدنا فيها حكم
نهائي وخلاص أتحكم
بأنة لازم يتعدم
محضر بوليس ..تحقيق نيابة ..حكم اول
حكم تاني
ونقد
أمر بالتنفيذ
كلة ف ورقة واحدة
بلعها خالد
حنا خفنا وقلنا ايوة يتعدم
(( من خاف سلم ))
لا مش حيسلم يا بلد
وان عاش حتبقي حياتة يابلدي عدم

الورقة فيها حكم بالاعدام علينا كلنا
اللى قتل خالد ..حيقتل الف خالد مننا
طول ماأحنا نامين تحت خوفنا وجبننا
يطلع نهار بكرة حتلقي الدور عليك
وتبلع روقة صفرا فيها اعدام مصرنا


أختي الشاعرة حنان أحنا جبناء وأنا اول جبان

أخى العزيز محمود جمعة
اشكرك على المشاركة والاضافة
و طبعا قوام لقوا له ألف تهمة
و حتى لو كان بلع حاجة
او حتى تاجر مخدرات
معقول المخبرين همة اللى بقوا بيصدروا الأحكام و كمان يبنفذوها ؟
احنا عايشين فى عصر الهمجية و غياب القانون و القيم

و المشكلة اننا لسة بنكذب على نفسنا
و بنقول اننا اشجع الشجعان
و يا ريت تدخل على موضوع لامتى حنفضل ساكتين فى القضايا العامة
و شوف لما انا قلت اننا شعب جبان لقيت ردود بتقول ان احنا اعظم شعب
حاجة غريبة جدا
احييك على شجاعتك على الأقل فى الاعتراف باننا شعب جبان

أختي العزيزة حنان ..دخلت وقرأت وكتبت هنا دعما لرأيك .. النعرات الكدابة المزيفة هي الغمامة الحقيقة على عيون الناس ...نبقي بنتهدد ليل ونهار ويقوبوا بلد الامن والامان .. يبقي غاب ادني معاملات ارادها الله ويقولوا مصر المؤمنة بلد الالف مأذنة ( حتي لو مليون مأذنة بدون معاملة ووعي وضمير يبقوا طوب واسمنت ) ..يقولوا احنا شعب حارب من 7 الاف سنة والولد يتقتل قدام عنين الناس وكل جبان واقف يبلع ريقة من الخوف .. الحقيقة لازن تتعري عشان نشوف سكتنا ...الحقيقة ان احنا جبناء ..وحبقضلوا من الداخل ومن الخارج يضربونا ميت جزمة لحد ما نفوق ..ونعرف الفرق بين الشعارات المزيفة وبين التصرفات اللى عايزها ربنا ... ثم عايزاها بلدنا عشان تبقي بلد ...والله أحمل مثلك هما في صدري يكاد صدري منة يحترق

نعم أخى محمود
اشكرك على التأييد
و الفرق بيننا و بين الشعوب الأخرى اننا عندنا حضارة و تاريخ عظيم
و عايزين نعيش فى ظله دون النظر الى المستقبل
اما غيرنا فهم شعوب بلا تاريخ زى امريكا مثلا
و لكنهم صنعوا التاريخ و المستقبل و الهيمنة على العالم

اللى عايز يعيش فى امجاد الماضى هو حر
فليرفع اللافتات و الشعارات الزائفة و العبيطة
و لما فى يوم ما يلاقيش بلده على الخريطة
فلا يلومن الا نفسه

حسبي الله ونعم الوكيل

الأستاذه الشاعره

حنان ابراهيم حاقظ

الحكايه ان احنا أحنا

مرغومين مكسور جناحنا

واما مره واحده نصرخ

نلقي طارئهم دابحنا
......
لنا الله

استاذى العزيز شاعر الوطن عادل سند
تقول هذا الكلام رغم علمى انك تعشق الوطن
و انا اعشقه من اعماق قلبى
و لكن كيف يظل الانسان عاشقا لوطنه
ان كان لا يشعر فيه بالأمان
و ليس مطمئنا على مستقبل اولاده ؟
وزى ما بيقولوا حاميها حراميها

الأخ العزيز ضياء
فعلا دعاؤك هذا هو خير الكلام فى تلك الظروف
حسبى الله و نعم الوكيل

أخى العزيز الشاعر الاستاذ يسرى حنفى
لا أدرى لمتى يظل ذلك الطارئ الذى اسمع عنه منذ ولدت
و لا ينتهى ابدا
و هل قانون الطوارئ لمواجهة الارهابيين
ام لقتل الابرياء من ابناء الشعب ؟

الله عليكي
شاعرة قديرة
الأخت حنان ابراهيم حافظ
تقبلي مني التحية والسلام

أستاذى العزيز دكتور صلاح طاهر
لقد أضأت الموضوع بأبياتك الوؤثرة
وسعدت بمرورك
رغم ان هذا الاعتداء سيظل ذكرى مؤلمة فى قلوب الجميع

يا رب نصحى ونفوق
و الا فليس لنا خيار الا الموت واحد ورا واحد

اشكرك ايها الشاعر المبدع الرائع حسام خليل
و اشكر لك متابعتك الدائمة
مع اجمل تحياتى

الأستاذ الشاعر طاهر الصوفانى
اشكرك على مساهمتك الجميلة
و فعلا العدل اندفن و معاه كل المعانى الجميلة