ليلة فرح

القصيدة بإلقاء صوتي ومرئي





ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ليلة فرح
ـــــــــــــــــ
ماشي في حضن الليل
ونجومة باصة عليا
الفرح ملهُوشْ سبيل
والشجن جوه فـ عنيا

داخل انا باب حارتنا
والخوف ساكن ملامحي
مش قادر أمشي خطوة
لا يزيد جوايا جرحي

شايف قدام عنيا
الزينه فـ كل حتة
من أول باب حارتنا
ولحد قدام بيتها

زغاريد بتعلي وعيال بتلعب
علي صوت أغاني قلبي الحزين
أنا قولت أمشي واهو بردو أهني
حاسس بقلبي فارس سجين
وشباب تسقف ترقص تغني
إزاي وليه وفـ شرع مين
يباتوا هما فـ أحسن ظروف
وانا ابات بقلبي مكسور حزين
منا نفسي أفرح وأطير وأرفرف
في الحب أدوب حتي يومين

في البلكونات ستات بنات
واقفين بإيدهم يرشو الملح
رجالة هناك فرقو شربات
وانا عيني تدمع من كتر الجرح

قربت أكتر بانت صورتها
مع شخص تاني ماسك إيديها
قربت تاني مش قادر أكمل
خايف لا عيني تيجي فـ عينها

بين المعازيم بمشي بهداوة
وكأن الأرض مفروشه بشوك
وفـ لحظة صمت ... مقدرتش أكمل
إتهز كياني ... بحلقت عنيا

لبسها الدبلة وغويشة كمان
وعنيه فـ عنيها مليانة حنان

حط إيده بين إيديها
و ع الموسيقي قالو نرقص
نزلت دموعي غصب عني
ولقيتني ببعد بهرب بعيد
ورا مني الذكري ملحقاني
الحلم اللي انا عيشت أفتكرة
إتحقق مع واحد تاني
طب ليه انا روحت من الأول
ورجعت لـ ليلي بأحزاني
ـــــــــــــــــــــــــــــــــــــــــــــــــــــــــــــ
بقلم : الشاعر محمد طلعت

الشاعر الرائع

محمد طلعت

الله عليك

وربنا يصبرك

تقبل تحيتي

أخوك

عمرو زيتون