كِلمَة وقَلَم وكتَاب

كِلمَة وقَلَم وكتَاب
ــــ ـ ـ ـ ـ ـ ـــــ

قَلَمي مِخَاصِمْنِي
وإتحَبَسِتْ جُواه الكِلْمَة
مَقدِرش يطَلَّع صَرْخِة أه
مَقدِرش يطَلَّع كلمة لأ
الكلمه مكتِّفهَا الحِبرْ
ولا بيكتب غير كلمة صَبْر
والصَبر نَفَدَ
زي الحِبر اللِي إتجَمِد
زي السِن اللِي إتكَسَّرْ
لمَّا حاول يكتِب لام كِلمِة لأ
لمَّا حاول يرسم حِلمه لكِلمِة حق

* * * *

في كتاب العَربي زمان
كانوا بِيِدُّونا كلام
إزاي نِتْهَز..
إزاي بِنْدَافع
إزاي بِِنصَرَّخ
ونطلح صوت
ويا إما ندافع .. ويا إما نموت
دلوقتي بنهرَب
أرضِنا بنْبِعْهَا
والوقت بِيعَدي وقَوام هيفوت
كانِتْ كَرَامِتْنَا
دي أعَزْ ما فينا
دِلوَقتي بكِلمَة
بنْبِيع بعضِينا
وبقينا نحِب نهيص
وقلوبنا بقت قصائيص
وكتَاب العَرَبي خلاص
إتْـلَـف صَبَحْ قراطِيس

* * * *

كَوِمُونا عَ الرصيف...
وبقينا علي طول بنخاف
ونمِدْ رجُولنا
مع طرف لحاف
ونصدق كل اللي بيتشاف
ده قالولنا طِلِعنَا القَمَر
مصدقناش
ورُّونا عَلَمهُم بيرَفرَف
صدقنا ومستعجِبْنَاش
مع إنُ زمان فـ كتاب العلوم
كانوا بيقولوا مَفيِش أضواء
كانوا بيقولوا مَعْدُوم الهواء
فوق القمر وفوق النجوم
وبردوا رَمِينا كتاب العلوم
وأخدو الزبَّال مِن كام يوم

* * * *

ودي حَاجَة تانية ومِش مَعقول
قالوا التَاريخ بيزَوَرُوه
وفـ التلفاز الاقيه بيقول
إن الهرم بَنَاهْ أبُوه
طَبْ قولي لمَّا بناه
كان سايب إيه جُوَاه
طب شَمْ عبير الأرْض
طب شَمْ نَسيمُه وهَوَاه
صدروا أوَامِر مِن كام يوم
وقالوا لِموا كُتُبْ التاريخ
روحت انا سائل قولت ليه
قالولي فيها غلطات يا بيه
وبَعد مُده وزعُوهَا
قالولي يا بختك ده شيء فَرِيدْ
خلاص بقا عندك تاريخ جِدِيدْ

* * * *

بصيت فـ خريطة
موجوده انا عندي
ولقيت مقاستنا
عمَّاله تِتْغير
خَطْ بيَهْرَبْ يِجِي يمين..
خط بيَهْرَبْ يطْلَع فوق..
وإتقال ده مقاسنا المظبوط
فَفَتَحْت كتاب الجُغْرَافيا
بصيت كِدَهُه علي ألوانة
تحت خطوطه بين صفحاته
لقيت الخرايط مش هي هي
وإن كتَابنا صَبَحْ قَديم
وإن الأن الوضع إتغير
قُومت مقَطَّع انا صَفَحَاتُة
مَزَقْت غُلاَفُه
ورَمِيتُه مِن الشِبَاكْ
ورسمت خريطة انا غيرها
ومكانَّا فيها متر في متر
لجل ما تِتْغَيَرْ ديَّه
ابقا مجَهِز واحدة جديده

* * * *

خير بَلَدنا
بيصَدَرُوا فِيه
والغَربْ أهُو عَايش
وبينْعَم بيه
وبنِرْجَع ناخده
نستورِدُه تاني
وبتَمَنُه الغالي
ويقولوا في عَجَز..
جُوَه المِيزَانِيَة
بصيت بعنيا
في الصَفْحَة التانية
فـ كتاب الحساب
بصيت انا في الأعداد
ولقيت في قواعد
وراجِعت عَلِيها
أرقام عمَّالَه
فـ دمَاغي شغَّالَة
والمِيزَانِيَة قُومْتْ حَاسِبْهَا وطِلْعِتْ صَحْ..
طَبْ إشمِعنَه جُم حَسَبُوهَا قالوا مِش صَحْ..
يبقى اللي إحْنَا إتعلِمناه في حيَاتنا...
كان مُشْ صَحْ
ومَدَام الحِسابْ مَصَبَحشِ حِساب
روحت انا مَاسكُه بِين إيدَيَا
ورَكَنتُه عَلَى أخِرْ رَفْ
ورَكَنت فُوقِيه جَرَانِينِي
على كام جِلدِة كُرَّاسْ
وده لَجل مَا يبقى تُرَاثْ

* * * *

كِلمَة وقَلَم وكتَاب
إتْفَرَقوا ...
مَبَقُوش أحبَاب
لا القَلَم بيكتِب كِلمَة
ولا الكِلمَة بِيسِيعْهَا كتاب
واللي فَاكِرني عَبِيط..
يمسِك قَلَمُة ويكتِب كِلمَة جُوَه كتَاب
صَدَّقْنِي..
مِشَيِقْدَر يكتِب صَرخِة اه
مِشَيِقْدَر يكتِب كِلمِة لأ
والحِبر هيتجَمِد
والسِن هيتكَسَّر
لمَّا يحَاوِل يرسِم حِلمُة لكِلمِة حَقْ
........
* * * * *

بقلم : محمد طلعت
يا ريت أعرف ردودكم وأرائكم

الاستاذ الشاعر

محمد طلعت

اولاّ : أهلاّ وسهلاّ بك فى بيتك ومنتداك .

ثانياّ : كلماتك تنم عن وجود شاعر واعد

ولن أضيف عن ما قاله أخوتى مسبقاّ .

الوزن مهم جداّ يا محمد وسوف تكتسب كل

هذا من خلال الإلتحام بالزملاء والممارسه

تقبل تحيتى وتقديرى ..