حسيت بالحب

حاولت كتير اعمل شاطر
والف وادور واجي واسافر
وبقالي سنين
عطشان لحنين
ما انا زي الطير اللي مهاجر
رغم انه حزين
وف قلبه أنين
بردو بيتعرض لمخاطر
وف كل مكان
يظهر ويبان
صياد بينشن ويشاور
على طول بيروح
طاير مجروح
طول عمره بينزف ويعافر
بيرفرف ينده ع الأحلام
بيحاول ينسى ومش فاكر
دا حتى الحلم بيتمناه
لو حتى بيحلم ع الطاير
طاير ، تعبان
واقف ، حيران
والقلب بينهج مش قادر
عايز يرتاح
ويداوي جراح
ويطلّع من قلبه مشاعر
حب وتنهيد
وإيمان بيزيد
والذكرى مليانه خواطر
بتطير حواليه
وتنادي عليه
متاخدني بالحضن يا شاعر
لساه حيران
طاير هيمان
بيلف الدنيا وفي الآخر
حسيت بالحب اللي انا عايزه
ولقيت أحبابي وبتفاخر
الله ع الحب اللي انا شايفه
ف مديح وعلاء رزق وجابر
وف كل الناس اللي معانا
والجو اللي بحبه الطاهر
وآمنت وقلت انا مش ماشي
خليني ف منشية ناصر
خليني ف منشية ناصر