يا انسان

موضوع: يا انسان السبت مايو 15, 2010 7:23 am

يا انسان

مالك يا انسان عاملى فيه حزين

ماشى وضميرك بيوجعك وبتسأل انت مين

تستعجب وتقول لنفسك اخرتها حتبقى فين

الرضا هيحل عليك ولا حتفضل كده مسكين

مش طايق نفسك....وبتسأل ربك

يا ترى ليه الدنيا قاسية

ليه مديالك ظهرها...ولا يمكن عاملة ناسية

ليه صحابك مش فاكرينك...ليه اللى حواليك مش عاجبينك

ليه بتصحى كل يوم مش عارف....رجليك على فين واخدينك

حتعدى النهارده بسلام....ولا حتقضيه كله كلام

ولا حتحاول تلاقى شغلانة....ولا حتيأس من دى الأيام

أيام صعبة وعيشة ظلومة....عقول تعبانة ونفوس مهمومة

لاتعدى على فرحان تكمّل فرحته....ولا تسيب الحبيب فى حلاوة صحبته

تلاقيها فجأة غدرت بيك....وسابتك وحيد ومحدش حواليك

تبكى وتدور وتقول مين ينجدنى..لا تلقى صوت يسمعك ولا كلمة ترد عليك

ممكن فى يوم ترضى عليك....تسرسب الحزن من بين ايديك

وتدخّل الفرح جوة عينيك....وتنسيك همومك اللى مكلبشة فيك

وفجأة تسرق كل الفرحة....وتسيبك وحيد وعينيك سارحة

يا ترى هى دى سنّة الحياة ؟....يا ترى اللى تعب و سابها عقله تاه؟

ولا كسب لما خلق لنفسه دنيا جديدة

يعيش فيها ملك زمانه وينسى نفسه الوحيدة

نفسه اللى خلته صبر....على دنيا ما صبرتش عليه

نفسه اللى قالتله استنى....خللى عندك ايمان بيه

خلقك وعارف ايه اللى فيها....وقالك يا انسان ماهو يافيها لاخفيها

تحب تعدى الاختبار الصعب ده....ولا حتقول لأ حرام مش قادر عاللى فيها

مش قادر على القسوة والكره والظلم

مش قادر على ندرة الفرحة وبعد الحلم

مش قادر على الأمل اللى بيطلع ف اول اليوم

ويرجع يغطس ميقبش ويسيبك غرقان ف الهموم

خلاص بقى استحمل وشيل

دنيتك اللى مش عجباك دى أسهل من كده بكتير

أسهل من اللى انت عامله ف نفسك

و بتبكى على حالك ومالك و برضه ناسى ربك

يا عم اشكر ربنا وقول ألف حمد

ده غيرك مش لاقى دالحال وعايش ياعينى ف صمت

حيقول يه يعنى غير ربنا المستعان

بيهوّن أى صعوبة و أى جرح كان

ماهو لما تقول الحمدلله...حتلاقى بالك مرتاح

ولما تقرا الكلمتين دول....حتقول يا رب حتكتبلى النجاح

عشان انا مؤمن بيك....وعارف انك عايزلى الخير

ومدينى أمانة تقيلة....لازم أسلمها بكل ضمير

ماهو لو انا ضعيف ومش قدها....ماكنتش وثقت فيا

وحططها فوق كتافى....وقولتلى هى ديا

هى دى دنيتك....هى دى حياتك

هى دى اللى حتعيشها....وتشيلها ف ذكرياتك

سيبك بقى من البكا....و ركز معايا يا انسان

شيل الأمانة واستحمل....ده ربك مهما كان

حاسس بيك وعارفك....أقوى من ألف بركان

حتعدى للبر التانى....وحتوصل شط الأمان

د انتا مهما كان أحسن ما خلق....خللى عندك ايمان

ايمان بربنا وببكرة....وبقوة الامكان

ياااااااا انسان

موضوع: رد: يا انسان السبت مايو 15, 2010 7:40 am

الله عليك

وما أروع صوفيتك أيها الأخ الرائع محمد

قصيدة جميلة ولو أن بها بعض الكسور الخفيفة وعلى سبيل المثال

....وسابتك وحيد ومحدش حواليك
----------------------

وأظن هنا ( عاملى فيه حزين ) تقصد عاملى فيها حزين

خطأ كيبوردى

ولكن بإذن الله القادم هيكون أروع .

شكراً لك ودمت بكل خير .

Very Happy

موضوع: رد: يا انسان السبت مايو 15, 2010 4:18 pm

الاستاذ / مجحمد الشربينى

ربما طول القصيده أضاع منك الوزن فى بعض المناطق

ولكن قصيده جيده ولو جلست قليلاّ معها لخرجت بصورة

أفضل . نحن فى انتظار الاجود .

شكراّ على تواجدك الجميل وووجودك البهى .

وتقبل مرورى ومودتى ...

موضوع: رد: يا انسان السبت مايو 15, 2010 4:42 pm

إنسان أيا إنسان ما أجهلك

ما أتفهك فى الكون وما أضألك

شمس وقمر وسدوم وملاين نجوم

وفاكرها يا موهوم مخلوقه لك

صلاح جاهين

رائع انت ايها الشاعر فى بهاء الكلمه

اتمنى دائما التوفيق

موضوع: رد: يا انسان الجمعة مايو 28, 2010 6:04 pm

اشكرك يا استاذة ايمان على هذا الاطراء المشّرف....وبالفعل كان هذا خطأ كيبوردى غير مقصود

موضوع: رد: يا انسان الجمعة مايو 28, 2010 6:05 pm

شكرا يا استاذ عادل على نصائحك الدائمة....ودائما ما نستفيد من خبراتك

موضوع: رد: يا انسان الجمعة مايو 28, 2010 6:08 pm

اشكرك يا استاذ خالد على ثنائك وارجو ان تنال اعمالى الاخرى اعجابك وشرف تعليقك

» انا مش انسان
» انسان بليد
» انسان ضعيف
» كبرياء انسان
» حب انسان عادي