عيد ميلاد سيدنا الهمام

كله في غاية التمام
وكلنا في غاية النشاط
عيد ميلاد سيدنا الهمام
فكلنا اخر انبساط
*
تمانين تحيه وفوقها كُــبه
مدد يا سيدنا يادكر
تمانين تحيه وزايده حبه
تعيش يا شعب وتفتكر
*
من ربع قرن وكام سنه
هليت علينا بـطلـّـتك
هايمين في حبك سوسنه
من عشقنا ومحبتك
*
وكلنا فدا حضرتك
هيا المحبه بتنشرا
و بنظرة بس ف سحنتك
ننسى العذاب واللي جرا
*
من عهد جدو منقرع
من عصر جنكيز الجدع
يمكن كمان قبل الميلاد
عاده وعلينا ماتنقطع
*
والله ماعاد فيه حد فاكر
ماحناش دفاتر تفتكر
اهو انت فينا من زمن
دا انتا تاريخ وكمان اثر
*
ياريحة نادرة من المغول
عَــزف قدرنا دا الوتر
هطل نقول علي وش غول
دا انتَ اللي باقي من التتر
*
ولا عمرنا نشكى الزمان
هو احنا يعني هنفتري
ونلاقي فين زيك أمان
باع فينا قبل مايشتري
*
مين اللى قال شبابنا شاب
أوفي المهالك انحدر
مش لاقي فرصة وأي باب
من حفرة ينزل إلي حفر
*
ولا السجون يومها اشتكت
من جلادينها وطوب حيطانها
رغم انها بقلوب حجر
ولا فيه عيون منك بكت
علي صبرنا تلاتين عجاف
لا من درى ولا حد شاف
علي الي مات فينا اندفن
من غير ياعيني ما ينكفن
في بلاد غريبه
وظروف عجيبه
في بحورمهالكك والمحن
علي العفن
جوا القلوب
وجنب اسوار الجناين
والطرق
علي الشقق جوا المدن
مدن السكن من غير سكن
مرهونه علي امضاء وزير
وواسطه من ماركة وزر
علي حريق قطر الصعيد
ولاّ بعنا كالعبيد
ولاّ ضحايا الطيارات
وعبارات للموت سفن
شباب ووَرد علي الغصون
ايه ذنبهم ودمهم ليه انهدر
من غير تمن
هل دا جزاء حب الوطن؟
علي طلعة الوهم يوم لنتصار
لما فات من خرم أبره الجمل
وجراحنا تنزف ليل نهار
اشلائنا وصديد للوطن
شاربينه والسُــكر انثمل
دمل من الوهم مالينا
ونعرة الكبر اللي فينا
ودِمِّل الصبر انفقع
علي جرح عمره ماندمل
علي العرايا اللي انكسوا
في خمارات حضن الهرم
تاريخ طويل من انجازات
تاريخ ومحفوف بالخطر
لافيه دوار ولاحلزونات
بيه اللي قبلك أنشطر
تعليم خصوصي
للعلام والتربية
ويضر إيه لو للترف
معهد دعارة للبنات
تصدير عوالم رقاصات
والعلم احلي من الشرف
علي الغلا علي البلا
علي بلاوي متلتله
ع اللي شوفناه بالعنين
ولااللي لسه مشفنهوش
واللي انحجب يمكن عجب
اعمار ياسيدي ومين يعيش
علي أديك شوفنا العجب
ربع قرن وكام سنه
انت وانا
عايشين هنا
نفس المكان نفس البلد
انت الزبد واحنا ياسيدي فداك كبد
تمانين تحيه وواحده فوق لجل ان نسيت
واتنين تلاته احتياط
يمكن قضايا يكون قريب
وعن سعادتك اروح اغيب
ملحقش اقولك تاني عام
كلنا اخر انبساط
كله في غاية التمام
*
(طاهر الصوفاني)