معركة تحديد مصير

الزمن ...
لحظات على الفجر الصدوق
أرسل يمهد للشروق
أرسل جنود متسلحة
متجهزين للمدبحة
اصل الظلام ...
مش من خياراته السلام
حالة الطوارئ اعلنت
بدأ الظلام التعبئة ...
والتهيئة
واتجمعت انصار كتير ...
مستموتة
بل هى أصلا ميتة
والضرب ف الميت بإيه ممكن يضير



المكان ...
جند العدو واقفين صفوف
وطاويط بتخرج م الكهوف
اعداد ماهياش هينة
من كل فج ...
ومن جميع الأمكنة
اصل القتال ...
على أرضهم
اقصد ع الأرض اللى - زعما - أرضهم
اللى احتلالهم ليها طال
خفافيشه واقفين باعتدال
اقصد خفافيش الاحتلال
على غير عادتها ف الوقوف
متحفزة ... طاوية الجناح والراس لفوق
لحظات على الفجر الصدوق
لحظات وتبدأ معركة تحديد مصير


المعركة ...
بدأت وبدأ الإشتباك
وبعيد هناك
مستنيين ...كل البشر
مترقبين ... مين ف النهاية هينتصر
رافعين ايديهم بالدعا
والدعوة عالية مسمعة
و مزلزلة قلب العدا
وعلى الصدا
السكرانين بدأت تفوق
علشان تقف وتشكّل الصف الأخير



مشهد نهاية...
خيوط بواسل من دهب
استشهدت
اتمددت ... فوق ف السما
راسمة لمشهد انما ...
منظر عجب
ماتت وراسمة بدمها
لون العلم
ابيض لكن ممزوج بدم
والديك صدح
وادانه مليان بالفرح
ادن بيعلن الانتصار
وعشان يمهد للنهار
ادى الاشارة للشروق
ودى كت نهاية معركة تحديد مصير