ميل ....بلكونتى

واخيرا
قلتلها ..بحبك
لكن شجن الروح...
خلّف تريقه ف الوش
فقالتها بنفس الحس
ح نخلّف صبيان وبنات
ح يكون بيتنا...
بيت العز...
..- انا اسف ...
....معلّش

قبل مااْدير ضهرى عليها واديها عرض كتافى
ميلة خيبتى
لمحت دموع خانقه عينيها
كاْن الحلم داهوه مااتشافش غير ويايّا
-زعلت
استنى ...افهمنى
انا حبيتك نفس الحب جوا ضلوعك
يمكن اكتر
لماقلعت هدومك ع السقاله
قصاد..بيتنا
فاكراك تتمنظر
اتنين صبيان مش لاحقينك
وانت بتمحّر
لما شخطت فيا اْدخل جوه
وامى بتتخانق ويا الجاره وعيالها
وزعقت بصوتك ف الشارع
الناس تبقى ف حالها
لما شافوك صحباتى ف الكليه
مصادفه
سلمت عليهم وعليا باْيديك الخشنه
ساعتها قالولى ...
صوابعه حديد.
لما حدفتك بالدبوس م البلكونه
لما لقيتك قاعد مع خالى ف الصاله وهو بيعرض بنته عليك
وانت عينيك
ماشافتش
غير الحيط المعووج
ف الشقه
حبيتك
لما كسرت الكوبايه ف وش الرغبه على القهوة
وهى بتلقّّّح على جارك العاجز وسيرة الست بتاعته
العفه
حبيتك
كان نفسى اخش ف حضنك تحت السلم
وابوسك
واشم الاسمنت ف صدرك متخمر بالرمله ف عرقك
وتبوسنى
جمعت الكتب من ع السلم ورميتها ف حضنى
احمد رمزى عاشك من ستين سنه فاتو
ف فتحة صدرك ...ف كمك المتشمر على زندك
ف لوح البنط الملفوح على كتفك
ف صباح الفل اللى بتقولها يوماتى لعم كمال
وانت طالع تسترزق
واللا مساء الفل اللى بترميها عالقهوة
وانت راجع بالعده
حبيتك
بس خدنى ف حضنك مره وقوللى..
..لما ابنك يطلب منّك دلوقت
تجرى تجيب نص اللبن اللى انت بنفسك عودّته عليه
حاتقول ايه ؟
طن الاسمنت بقا بكام؟
دى الصنعه يابنى مابتديش احلام
الناس دلوقتى ما بتبنيش ولا بتمحر
_خدنى ف حضنك
فهّمنى ...هاتستحملنى
لما انفاسى تتغير....ويضيق خلقى
اقولك
انا نفسى ف حاجه ماهياش موجوده ف التلاجه
ولا ف الحله
مش راح تقعد ويا صحابك عالقهوه
مش ح تقولها....
ديت فقر
خدنى ف حضنك
واعزق برجولتك ارضى الخصبه
طلّع فاكهة تحلى مرار الصبر ف حلقى
لماتتعكر ايامك وتقعد بالاسابيع..
م الشغل
مين حايغتنى
ف ضيقة خلقك وانت بتشتمنى
وتطفى سيجارتك ف ايديك الخشنه
وياخدك حضنى
غصبن عنّى
ما انت منّى
دى حالة ابويا قبل ماياخده الموت من امى...
انا حبيتك..
وانت بتبنى
اوعى تهد الحلم الابيض..
سيبنى
روح ابنى ف بيوت الاغنيا
ببلاش
اقعد عالقهوة
اشرب شاى ع النوته
ولعّ ف سجايرك
المح ميل بلكونتى ف دخانها
وموت
بس اوعى تموت
وانت
ف
حضنى
------------------
[center][center]

alah 3alyk ya fanan