ليه ياملك تحرمنا من عرشك ؟

إنت الكبير
ملك الغابات اللى احنا فيها بننكتب ..
ولاننقراش
وماعندناش مانع نحبك ،
وماعندناش مانع نشيلك فوق رقابنا ..
بس لو ماكسَرْتهاش
وعندنا استعداد نأكّد حبنا ونحلف بكل الأنبيا ..
وبربنا ..
إن احنا مش ممكن نشيل لك يوم خناجر ،
ولاعندنا استعداد نحاربك بالحناجر
ماهو انت واحد مننا ولك فى القلوب ضلّة وشجر
بس احنا مش فاهمينك انت كارهنا ليه ،
راضيين تكون انت الملك ،
والعرش بنآمنك عليه ،
لكن انت رافض احتمال قعدتنا دايماً مطرحك
فِرِحْنا بيك وانت الملك ..
فـ ادّينا فرصة نفَرّحك ،
واسمح لواحد مننا ..
(يحلم) يكون بعدك ملك
ومش مهم دا يبقى مين !!
مالغابة فيها رعايا بالملايين
فـ ادّينا حق الاختيار
إنت اللى فى إيديك القرار ،
واحنا اللى فى إيدينا اللهب
إشتقنا للـ (حلم الصفيح) ،
وزهقنا م الـ (وهم الدهب)
من أدّ إيه مستنظرين تفتح لنا الخُرّاج ،
إسمح لنا نقول لك بدون إحرج : ماتتّاخر
عشّمتنا بالـ (فجر) بس لقينا فى الآخر نصيبنا (الليل)
علّمنا نركب خيل عشان وقت اللزوم تلقى ..
وراك فرسان
دى الوردة مهما تكون جميلة عمرها ماتعَمّر البستان !!
وحْياتك انت مافيه وجع من نحْيتك ،
ولافيه ضرورة نقول كتير فى محبتك ،
مفيش ضرورة الوقت غير حوْجة صدورنا للنفَس ،
دى الآهة لمّا بتنحبَس ..
تملا القلوب صهد وبخار ،
إحنا الصغار.. وانت الكبير ،
إحنا الرعايا وانت طوووول عمرك ملك
ليه ياملك تحرمنا من عرشك ؟
مش انت عارف ياملك ..
إن احنا أحفادك ؟
طب سيبنا نبقى لحضرتك ذكرى ،
مش انت طول عمرك تقول ان احنا (أنصارك) ؟
طب ليه بتشطب إسمنا من دفتر (الهجرة) ؟
ليه لمّا واحد مننا (يحسّس) على العرش نلاقيك ..
قطعت (إيده) ؟ ،
ليه لمّا واحد مننا (يحلم) بعرشك تحرمه من (النوم) ؟ ،
و(تنابلة السلطان) يشوّهوا منظره ؟
ويقُصّوا من نخله الجريد ..
ويعلّقوله قرون ؟
لو كنت(موسى) ياملك حضّر لبكره (هارون) ،
إدّيله حق الاقتراب م العرش والتصوير
صدّقنى فيه بين الرعايا كتير لايقين قوى ع العرش
إفرد قلوبهم ياملك (تندة) ..
تحمى المزارع م (المطر)
ماهو لو مفيش غيرك (إمام) ..
(صلاتنا) رح تبقى فْ خطر
قرّبنا منك ياملك ،
واقبل يكون لك (مننا) لبكره امتداد ،
وبلاش تعاقب حدّ ع الحلم المُباح ،
ولاتقبل ان (تنابلة السلطان) يتِفّوا على القمر ،
ويحطوا فوق وش (الحبايب) طين
هوّ احنا مش ماضيين معاك عقد اقتسام حب الوطن ؟
بتنسى ليه ؟
وليه مصمم ياملك تحرمنا من عرشك ؟

تقبل شكرى أخى صلاح
وأهديك حديقة زهور بأكملها