ياقسوتك

يا قسوتك ع القلب لما بتقسى وانتى أحن من فى الكون عليه
وانتى اللى ليه
لو تتعبيه
يفضل يدور ع الحنان وسط القلوب
يفضل يدوب
لما حنانك يلسمه ... يسحر وجوده
ألقاه صبى عمال بيجرى ف الغيطان
تحضن خطاويه الأراضى بشوق
يطلع لفوق
عن القمر
تُدور سواقى الأرض تروى العطشانين
تنزل فرات
تنكسف منها الشراقى وتبتسم
تحضن ترابها
ترتعش
تِخضر فوقها عيدان أمل
وتضمنى
وتهزنى
لجل أما افوق
ألقى القساوه تهدنى
تكتبنى ويا المحرومين :"محروم"
محروم ياللى مالكشى حد يحن لك
ويخاف عليك
محروم ياللى مالكشى بيت يوحشك
ويونسك
يشع نور قنديله نار
تكوى الضلوع
ترحل عواميد الشوارع
شايله كل الضى ليك
فارده دراعتها للرجوع
تسيب دموع القناديل
يملى العذاب سنوات غيابك
مايدق بابك حد م اللى تحبهم
ماسمعشى غير الماووييل
ويدق قلب الليل يسمَّع ف الودان كل الندا
وانت واقف ف المفارق
واللى مفارق
تتلقفه كل العيون
تحضن عيونه
ترسم شجونه : بيت كبير
جواه شجر
جواه جُمل تشتاق لسطرك
جواه ألم
دايب ف عطرَك
تفضل تبارز ف الفوارس من دون سلاح
ولا دروع
من غير سند
تموت كما اللى مالهوشى حد
تسيب آمال
لو تنزرع تطرح محبة ف السنين
تمحى الأنين
تكتب على جبين فُرقتك :فرحة لُقاك
وتُطل من تكاعيب هواك
عناقيد لُقى
ومواعيد أسيَّه
يا قسوتك

استاذ / محمد
قصيدة جميلة
ولو هى متلحنة
ياريت نسمعها
وليا سؤال ؟
حضرتك تقصد
تحضن خطاويه الأراضى بشوق
يطلع لفوق
عن القمر
ولا تقصد (عند القمر )
بس الحروف مكتوبة خطأ