شرم برم

ياأم حتشبسوت

محبوسه جوه تابوت

وكتروا ليه الهكسوس

أحمس وتوت مايموت



نظره لفراعينك

لسانه علي دينك

سبتينا للهلافيت

أكلونا سلاطينك



البرد مستورد

من عبدة الخنازير

للطب بنصدر

ودوانا بقي فوازير



والميه مش م النيل

دا الهم في قزايز

شاربينها في إسرائيل

أو أمريكان جايز



القطن جاي م الصين

ياطويلة التيله

ناقص نجيب الطين

ياقلة الحيله



القمح دا روسي

وبخورنا هندوسي

ليه قمحي مش مطحون

وانا زارعه بفلوسي



من غيظي من كيدي

تنزل دموم حيضي

شفتوش راجل بيحيض

والعيب مهوش عيبي



أهين ياعيب الشوم

من فين أجيب النوم

من فينا قال راجل

وليه يبات مظلوم



خبرجديد عاجل

ليه العيار فالت

طاير حمام زاجل

لما الرجال مالت



قامت نسا قالت

جسور خلاص زالت

جيهان وقاسم امين

قوانين هنا سادت



مساواة وساووا الروس

وجوزك المحروس

في البيت يربي عيال

موكوسه علي موكوس



وكُحِيله للخيال

ياحفدة الفراعين

ياخلد للاجيال

ليه قالت النساوين



فتاوي ومهالك

ضمير وكان سالك

في الغربه مات مقتول

ماسمعش لسؤالك



مدفون وعاد صاحبه

راجع يغني يقول

ياأرض كآت رحبة

ماتساعنيش بالطول؟



عايد معايا المال

شايل حمول وحمال

من كل شئ غالي

من بعد هول وأهوال



مش لاقي ليه عيالي

دول كانوا علي بالي

قبلن ماروح باسبوع

ياحالي فين حالي



ماهوه دا الموضوع

شرم برم احيه

وكلام كتير ممنوع

فهمت حاجه يابيه



فهمتي حاجه ياست

عمال اعيد وازيد

في عيالي واد مع بنت

وزيد يقول لعبيد



شرم برم



(طاهر الصوفاني)