هيّه الحياه كده

زي نور شقي / زي روحك
زي عنيك ..
هيه الحياه كده
فيها كل أصناف التعب والناس
فتافيت أحلام علي كام وجع
وفرح وحيد
زي حلمك / زي قلبك
زيها ..
البنت اللي بتطلع علي شجر الليل ف عنيك
وتقطفلك من كل ماتشتهي حواديت
مافتش عليها حزين بسلام
ولا ميل هواها ف يوم
لغريب
زي حزنك / زي دمعك
زي ليل ..
واقف مابينا ف الهوي
وكل مانقرب
يشد
تتبدل حلاوتها بمر ف عنينا
نتوه
مانلقاش بعض
نرتجل أشياء كتير مانفهمهاش
بين الحقيقه والإندهاش
هيه الحياه كده ..

الاخ الشاعر

مراد ناجح

كما انت رائع وموضوعاتك بها دائماّ الدهشه

وانت متميز بتضفير قصائدك بالجمل التصويريه

التى تضيف البهاء لكلماتك .

تقبل منى مرورى مع خالص تحياتى ..