حاجات واجعانى

مع اعتذارى أنا لما قولت العفريت مش قصدى اخبى اسمى ولا تغيير جنسى بس مش عارف ليه بلاقى نفسى عفريت
وعلى العموم أخوكم فى الله محمد عليو شاعر من قنا وانا بتشرف بيكم وبتعليقاتكم المؤثرة فى نفسى
للتواصل
http://3leewa.blogspot.com

فاشل

كل ظن المواطن
عن ظهرقلب
قبل ما يكبر
وقبل مايحب
انه فاشل
راسم طريقه
بالمهالك
شاغل فكره
باللى بالى بالك
واللى مش بيفكر
اليومين دول
يبقى مش عاقل
وحياة نومة الفجر اللى اتحرمت
وحياة ودانى اللى بالنصايح اتخرمت
وحياة قلوبنا اللى فى صدورنا اتحطمت
حييجى اليوم
ننفجر بالغضب
والانفجار مش ساهل


بطالة

من حالة لحالة
والناس الشغالة
بين وزير وعمالة
وكروت الجوالة
حسست الناس بالخوف
وعملت للفوضى ظروف
ونزلت ثبتت حالة


الناصية الجاية

سكة سفر
وطريق بعيدة
ابعد ما تكون ع البشر
وجزمة مقطعة
واحلام متلطعة
جنب النجمة العالية
يمين فى شمال
جنب القمر
والمستحيل
بعد خطوة او خطوتين
بعد سنة او عشرين
بعد ما يبقى العايشين
ضمن الصاحيين الميتين
ونيست مالكش ...
فى سكة الحب ولا السهر


شلولو

العصفور قبل الصوصوة
لما راح يصوصو
ماكانش فاكر الدنيا كده
فيه كلب عوعو
كان فاكر الدنيا لعب
راح الرعد من فوقه كوكو
لوا بوزه العصفور زوزو
ورضى بنصيبه سلم جناحه
للهوا وهوهو
وفضل ياكل من م الحب
ويغمس من الجوع شلولو
يالا اللى عنده ريش
احسن من ما فيش
وكفاية عليه
يطير ويصوصو
احسن ما يقعد يكن
وبدل مايطير ينونو

الجرح

لما كان الزمان زمان
وكان الواحد شعره على عنيه
قال الكون دا بتاعى
يبقى ما حبش ليه
شوف حكمة ربنا
خلق الانسان
نساى على ما هو عليه
اولها طمع
اخرها بدع
ضاع الجدع
بعد ما كترة بلاويه
ونسى ربه فى نظرة عين
واخر السكة دلوقتى فين
راح الشعر
ورمح العمر
وولدين وبنت
و30 فى الشهر
وسجادة مفرودة
على كام بلاطة سودة
ودمعة طالعة
من عنيه
شماعة
أخر زمن ...
شماعة الوطن
طريق كل اللى حزن
وكوسة وهيصة
وامبريالية وكفن
من ايه نخاف
طول ما معانا ربنا
فى الفرح
فى الجرح
فى المحن
حنضيع كلنا
ما هى ضاعت من قبلنا السنن
وطن ... وشوية كلاب بتنهش
وناس تستنى اخر الشهر
وناس كل ساعة تكبش
ودمعة مريض واجعانى
وناس ع البسين تفرش
وناس تاكل بعضها
والمرض...
فى قلب الوطن
استوطن وسكن

رد الكلام

رد الكلام
على الكلام
بعدم الكلام احسن
رد الظلم على الظلم
بعدم السكوت اصلا
ونهاية الطريق
لأى طريق
عدم الرجوع فعلا
وانهيار السد
اللى وراه الجد
ما يحصلش ابدا
رفض الدمع للدمع
سهر الليالى
وقيد الصوابع شمع
وقف العالم المخزول
ووقف الجمع
الانبهار ورا الانهيار
والتتار ماداموش
واليهود
بنو السور والسدود
وخطفوا من الكون
البصر والسمع

[center]

حلو جدا وواضح أنك شاعر متميز وليك مستقبل بس بصراحة أكتر حاجة شدتنى وعجبتنى هى
الناصية الجاية وردت الكلام لمسونى جدا وأمامك مستقبل جميل بأذن الله وعلى فكرة سهل جدا تغيير أسمك ف المنتدى ألى الأسم الحقيقى لكى تعرف به فيما بعد وأنت أنسان جميل قلبا وقالبا ولا داعى أبدا لرؤية نفسك عفريت أنت مبدع عميق الرؤية وةمنتظرين أبداع أجمل بأذن الله

قصيدة جميلة يا استاذ محمد
و ياليتك تشيل العفريت خالص يا راجل