مش بحبك " من وحي قصيدة [مخبول .. ولكن ] "

مش راح أكدب يوم عليكي
وبصراحة
مش بحبك
ما انتِ ... أهلك
وانتِ ... جهلك
وانتِ توهة ف بِيْد مجاهلك
انتِ ! أخلاق الفقارى
وانتِ ! كرباج الحيارى

مش بحبك

طب واحبك ليه قولي لي
ميتك مش هيه نيلي
أعشقك ! يِسْوَدّ ليلي
مش بحبك

مخدوعين ! حبوا ف ترابك
والنتيجة ؛ سنين عذابك
واللي باعك .. عاش متاعك
واللي حبك .. شاف خداعك
أصل حبي ..
وانتمائي
مش لطين دايس عليه
انتمائي لشعب عايش
عنده نخوة
في الشقا اتشدّ بيه
شعب في الغربة تلاقيه

كل أرض الله في شرعه
طاهرة تنفع تبقى أم ؛
أرض (عوفر) أرض( حنا )
أرض نار أو أرض جنة
أي أرض تصون مشاعري
تبقى أمي
المهم الأرض يسرح فوق ترابها
شعب بيرد اغترابها
شعب يمسح نار عذابها
شعب بيحب بصحيح
شعب عابد ربّ مش عابد كسيح

قولي خاين
قولي هاين
قولي مش صاين جميلك
ما انتي نيلك
بات معكَّر
وامَّا افكَّر !!
مش بنام من حرّ ويلك
خدعة من عهد الفراعنة
حفَّظوها للغلابة ..
رددوها ع الربابة ..
إننا بنحب طينك
مجبورين نحفظ رَطينك
خليتينا ننسى دينَّا
نعيش ( لدينك )
( دين ) سارقنا
( دين ) حارقنا
( دين ) حابسنا
( دين ) دايسنا
( دين ) وارثنا
( دين ) كلاب تحضن متاعك
واحنا بنسدد في دينك

مش بحبك

ربنا حدد ولاءنا ..
وانتمائنا
لأرض فيها الرزق لينا
مهما كانت
أرض نعبد فيها رب ..
إله وواحد
مش إله غدَّار وجاحد ..

مش بحبك

بس قولي ازاي أحبك
وانتِ عارفة
إن قلبي
من زمان لاعنك وسابِّك
و انتِ تاركة فرض ربك
عايشة ساجدة لرب كربك
دايسة ناسك
تحت ظلم سنين مداسك
حابة قبرك
عاشقة صبرك
خانقة صوت الحق فوق
أركان منابرك

ليه أحبك

فيكي إيه يسعد فؤادي
وأد مستقبل ولادي ؟
واللا دمعي ف ليل سهادي ؟
واللا أغنية ( بلادي )؟
وانتي أصلاً مش بلادي

مش بحبك