سامحيني

سامحيني
***
سامحينى مش ناقص مرض
أنا مش بضاعة بتنعرض
ولا سلعة بايرة
فى المزاد
كان نفسى أكون لك
سندباد
وأملا خزاين مهجتك
فضة ودهب
لكنّى ياخسارة قوى
عمرى ما كنت السندباد
ولا كنت يوم
راجل غنى
أنا مش غبى
أنا كنت عارفك من زمان
عارف بإنك من ورق
توبك جميل
رحت أمسكه لقيتّه خرق
ولقيتنى بعشق فى القلق !
***
أيه يعنى حبّك
عاش فى قلبى
يجرحه مِيّه
ومرّه بيداويه؟!
أيه يعنى طيفك
عاش فى حلمى
وكل أملى
يحسّ بىّ
وبين إيدىّ ألتقيه؟!
أيه يعنى عمرى بحاله ضاع
عشنا الضياع
فى حاجات كتيرة من زمن
فى العشق وهموم الوطن
سامحينى مش هاقدر
أواصل رحلتى
مش هاقدر أرقص
فوق كرامتى ومهجتى
قلبى أدوسه بجذمتى
ومعبدك عندى خلاص
جانى الخلاص
لما حاولتى تضيّعى
صورتى كراجل
يومها كان الرد عاجل
كان زمان
دى غلطتى
إوعى تجينى ف سكّتى
سامحينى
مش ناقص مرض
أنا مش بضاعة بتنعرض
ولا سلعة بايره
فى المزاد!
****
14 / 3 / 1999
من ديوان العيون السود

القدير الغالى جدا

عاطف الجندى

مش ممكن جمال القصيده دى

الواحد لو يقعد يقراها ميت مره مش ممكن يزهق ابدا

وبعدين من حقك بصراحه كل اللى قولتو لها

بس ياريت أنت اللى تسامحها بعد كل دا

دمت رائعا متجددا عميق النظره

دمت بكل خير وحب

ملحوظه

تثبت القصيده ثانيا بواسطتى

لروعة الشاعر والحرف والمضمون