فضوها سيرة

موضوع: فضوها سيرة الجمعة مايو 08, 2009 4:03 am

فضوها سيرة
غنيتوا كتير للحب .. ولامتى تغنوا ليه
ماتشوفوا سيرة تانية.. تبعدنا عن لياليه
هي المعاني خلصت.. ولا الواحد بقى فاضي
ولا الأماني وقفت على أمل واحد فاضي
ولا أحنا خلاص فاضيين للحب والغرام
لأ ده أحنا تعبانين تايهين وسط الزحام
ولا حد فاضي يعشق ويطير ويا الهوا
ولو عشق حيغرق في قرار مالوش دوا
وانتوا تغنوا للحب ومفيش سيرة تانية
في عالم من غير قلب .. مش قادر يحب لثانية
قفلوا على دي سيرة
ماحناش فاضيين للحيرة
في حياتنا العسيرة ودماغنا السكيرة
..........................
دماغنا ياناس مقلوبة .. وتقولوا حب وحبوبة
إرادتنا كمان مسلوبة والعيشة بقت مخروبة
اللي جيبه مفلس وبيعرق عـ الرغيف
واللي عاير يتجوز والعمر في الخريف
واللي كل أماله .. يعرف طريق أماله
ومهما احتار خياله.. مش حيلقى مكانه
وبلاد بتحارب بعض.. نسيوا أنهم من الأرض
وناس بتاكل بعض.. وناس تخون الود
وانتوا تغنوا للحب ومفيش سيرة تانية
في عالم من غير قلب .. مش قادر يحب لثانية
قفلوا على دي سيرة
ماحناش فاضيين للحيرة
في حياتنا العسيرة ودماغنا السكيرة
..........................

موضوع: رد: فضوها سيرة الجمعة مايو 08, 2009 6:33 am

هو فيه أجمل مكن سيرة الحب و غدا ألقاك يا عمنا
- بالمشاكسه مع ام كلثوم - و فالحب هو أجمل شىء على هذا الوجود
الحب بمعناه الشامل فهو العطاء و التضحية و قصيدتك هذه لها وجهة نظرها التى أحترمها
و أتفهمها بالطبع و هى نقد لمن ينشغل بعواطفه و يترك لقمة عيشه
و كلامك سليم تماما من هذه الناحية و من هنا أشد على يديك
مودتى لروعتك
أخوك

موضوع: رد: فضوها سيرة الجمعة مايو 08, 2009 8:26 am

الاخ الشاعر
طارق منيب
والله عندك حق . يا عم دى عالم فاضيه .
بس بينك وبينك وما تقولش لحد رغم انى
{ عارفك فتّان } الحب جميل قوى يا طارق
والدنيا من غيره تبقى غابه وشكلها وحش قوى
طب ياراجل بذمتك كلامى صح ولا غلط ؟
كل الموده والتقدير ...

موضوع: رد: فضوها سيرة الجمعة مايو 08, 2009 8:55 am

أخوتي الأحباء..
شكراً لتعليقكم الجميل..
الكلام ده كتبنه من 27 سنة.. سنة 82 سنة بالتحديد ( أثناء تأدية الخدمة العسكرية) وكان ساعتها بداية معرفة الواحد إن في الحياة ضغوط كتيرة ممكن تشكل حيز كبير في حياته..
وعموماً أنا بيها مش باهاجم الغناء للحب.. بقدر إني مابأيدش أنه يستحوذ على غنانا بالطريقة دي.. ويمكن نذكر سيد درويش (الله يرحمه).. لما غنى للسياسة ( قوم يامصري، يابلح زغلول) والاقتصاد ( القلل القناوي، محسوب جنداس) والمهن ( منها العربجية والجرسونات)، والمشاكل الاجتماعية ( بروكتنا)، ولقمة العيش ( الحلوة دي، وطلعت يامحلا نورها)، والإدمان( الحشاشين)، والحب ( على قد الليل، وأنا هويت)، وهذا ماقصدته، إن الحب يشغل حيز يمثل نسبة في حياتنا، ولكنه ليس المحور الوحيد اللي لازم ندور عليه ونلف عليه في كل كتابتنا، والحب له أبعاد كتير ومعاني كتير غير المعنى المتدارك .. واحد بيحب واحدة.. هذا ماقصدته.. أما الحب أسمى شئ فقد انحصر في معنى واحد ( خصوصاً وقتها)، شوف بيرم ( الله يرحمه) في (لندن وباريس)، والقلب يعشق كل جميل ( وهو نوع من الحب)، أما إن الناس تغني للحب بس، فده معناه إ إننا مش شايفين كل أبعاد الحياة.. وممكن نغني للحب على أنه حل للأزمات كلها اللي احنا فيها.. شكراً ياأساتذتي الكبار لتعليقاتكم الجميلة.. وإن شاء الله المرة الجاية عشان أثبتلكم إني مش ضد الغناء للحب.. حيكون كلامي عن الحب..

موضوع: رد: فضوها سيرة الجمعة مايو 08, 2009 8:58 am

كلنا نحب و نحبك أيضا أستاذ طارق
و من منا يستطيع أن يهاجم الحب

موضوع: رد: فضوها سيرة الجمعة مايو 08, 2009 9:17 am

أكبر دليل على أني مش كاره الحب.. إني مش كاره الأهلي.. مع أني ترسناوي قديم.. والأهلي غلب الترسانة امبارح.. تحياتي ياعاشق الأهلي.. وعلى فكرة لما تقرأ كلامي حتتأكد أني مش ضد الحب.. ولكن يستحوذ فقط على جزء من حياتنا مش حياتنا كلها..

موضوع: رد: فضوها سيرة الجمعة مايو 08, 2009 5:03 pm

خالى العزيز:
أنا أول واحدة عارفة أنك مشضدد الحب عارف لية لأنى قريبة منك وعارفة أزاى ؟أنت بتخاف علينا ومشاعرك كلها فياضة بالحب لجميع البشر الفكرة أنك من كتر حبك لبلدك ولأهلك وأحبابك عايزهم يكونو فى تكامل كامل بلا عيوب وهذا شىء مستحيل فالكمال لله وحده وياريت كنا نقدر نصلح كل شىء فسبحان الله له الملك الدوام نسبها لربنا وونتوكل علية ونعمل اللى علينا على أد منقدر أشكرك بشدة

موضوع: رد: فضوها سيرة الإثنين مايو 11, 2009 10:16 pm

ستاذ طارق
جميل بكل المقايس وانت بقصيدتك بتعلم الحب
بس الحب الحقيقى الهادف بجد جميلة بكل المعانى
عزة الزرقانى[b]

موضوع: رد: فضوها سيرة الثلاثاء مايو 12, 2009 1:06 am

حبيبتى عزة يا لك من رائعة وجميلة فى مشاعرك وأحساسك الراقى حقيقى بحب أشوفك كتير بس الظروف كلنا نعتز بك جميعا لكى منى كل الحب

موضوع: رد: فضوها سيرة الثلاثاء مايو 12, 2009 7:58 am

شكراً كثيراً ياأستاذة عزة على كلامك الرقيق وهي شهادة الأستاذة للتلميذ.. أما رشا فلازم تشهدلي كويس .. لإما ...هي عارفة؟؟؟؟

موضوع: رد: فضوها سيرة الخميس مايو 14, 2009 10:59 am

ربنا يوفقك استاذ طارق
جميلة قصيدتك